Itanagar, Iaiong:
Katkum ki khubor la iathuh ba ki shipai ka Arunachal Pradesh ki la ioh ban kem noh ia u Rocksen Homchha, uba long u dkhot jong ka kynhun lehnoh NSCN-K bad uba la lait phet na Khonsa jail jong ka distrik Tirap ka Arunachal Pradesh.
Kumta la ong ba ha ka step Lah Sngi U Blei, ka kynhun shipai ka la ioh kem noh ia utei u lehnoh uba la lait phet na ka thaiñ Bogapani jong ka distrik Tirap ha Arunachal Pradesh.
Ha katei ka sngi, ki bor pahara ki la ioh kurup ruh ia kawei ka suloi AK-47 na ki jingdon jingem jong u Rocksen Homchh ha katei ka por.
Ia katei ka jingkhynra la lam khmat da u heh pulit ka Tirap u SP Kardak Riba, ha ryngkat ka jingiatrei lang jong ka tnat CRPF, IRBN bad ka STF ban thwet ia utei u dkhot jong katei ka kynhun lehnoh hadien ka jinglait phet jong u na katei ka patok ha Bogapani.
La ong ba ha ka 27 tarik jong u Lber ba la leit, arngut ki dkhot jong katei ka kynhunn ehrang NSCN-K, kynthup ia u Rocksen Homchha bad u Tipu Kitnya kiba la laitphet na ka patok Khonsa jong ka distrik Tirap ha Arunachal Pradesh, ha kaba kitei ki 2ngut ki la pyniap ia uwei u heh pulit bad pynmynsaw pat ia 2 ngut ki langrut ha katei ka por na ki lait phet.
