Imphal, Iaiong:
Ki bor sorkar jong ka jylla Manipur ha ka 3 tarik mynta u bnai ki la pyntip ba uwei u briew u la mynsaw jur hadien ka jingbthei jong u bom Improvised Explosive Device (IED) kaba la jia ha ka shnong Ukhrul ha ka janmiet jong ka Lah Sngi U Blei mynta ka taiew.
Kat kum ki jingïoh lum jingtip la ïathuh ba katei ka jingjia bthei bom ka la jia ha kawei ka jaka kaba don hadpeng ka Makhan Store bad ka Viewland Baptist Church, Ukhrul ha ka por kumba 6 baje janmiet.
Kat kum ki jingïoh lum jingtip la ïathuh ba ïa u briew u ba la ïoh ïa ki jingmynsaw na katei ka jingjia la leit ban pynkit noh sha kawei ka hospital kaba Marjan. Tad haduh ba la ïoh ïa kane ka khubor, la ïathuh ba kim pat shym la don satia kino kino ki kynhun runar ne ki seng kieng atiar kiba la wan shakhmat ban kam ïa ka jingdonkti ha katei ka kam beaiñ.
Hadien katei ka jingjia, la ïathuh ba na ka linag ki bor pulit ka thaiñ Ukhrul bad ki bor shipai na ka distrik ki la leit mar mar sha katei ka jaka na ka bynta ban lum jingtip bad kumjuh ruh na ka bynta ban pynsdang ïa ki kam tohkit khnang ban ïoh kem noh ïa ki runar kiba la donkti ha katei ka kam beaiñ.
Kat kum ki jingïoh lum jingtip la ïathuh ba katei ka jingjia bthei bom ha katei ka sngi ka dei ka jingjia bthei bom kaba lai kaba la jia hapoh ki 3 bnai ha ka thaiñ Ukhrul district.
Dang ha ka 21 tarik u Lber, 2023 uwei u bom IED u ba khlaiñ bor bha u la bthei hapoh ka phyllaw trei kam jong ka mini secretariat kaba don ha ka thaiñ Ukhrul bad na katei ka jingjia la ïathuh ba tang ka kynroh jong katei ka ïing mala kaba la julor malu mala.
Shuh shuh dang ha ka 25 tarik u Kyllalyngkot, 2023 uwei u bom IED u ba khlaiñ bor bha u la bthei ha ka thaiñ Ukhrul bad ha katei ka jingjia ki la don haduh 4 ngut ki riew paidbah kiba la ïoh ïa ki jingmynsaw.
