Guwahati, Iaïong:
Haduh 64 tylli ki shnong kiba don ha Upper Assam, Dibrugarh ki la shah pynjulor na ka daw jong ka jinghap phria kaba shyrkhei bha ha kaba nalor jong ki iing ki sem kiba la shah pynjulor la ioh khubor ba u phria ula pynkyllon bad pyn khyllem ruh wat ia ki dieng bad ki post ilektrik bad pynduh bording ha kiba bun ki bynta jong ka shnong Dibrugarh.
Hadien jong kane ka jinghap phria ka sorkar ka la shim khia ban phah maramot noh ia ki post ilektrik khnang ba yn lah ban pynpoi bording biang sha baroh ki shnong bad kane ka jinghap phria bajur ka la jia ha ka sngi u Blei janmiet.
Ki khubor ba la iohlum ki iathuh ba nalor jong kane ka jinghap phria ka la don ruh ka jingther u lapbah lapsan ha ki katto katne ki bynta jong ka Dibrugarh ong ka khubor ba la pyllait da ka ASDMA.
Hadien jong katei ka jinghap phria bad jingjur slap ka Dibrugarh District Administration ka la phah ia ki lad jingiarap sha kito ki longiing kiba la ngat ha kaba kum kane ka jingjia bad ki khubor ki iathuh ruh ba uwei u briew uba na Chabua Revenue Circle ula mynsaw jur na kane ka jingjia.
Ha ka jingleit jurip jong ki heh la sakhi ba ki la don kumba katto katne ki iing kiba la julor bha na ka daw jong ka jinghap phria bad kane ka dei ha ka bynta jong ka Moran Revenue Circle.
Kane ka dei ka sien ba-ar ba ka Dibrugarh kan mad ia ka jingshah lynshop ha u phria ha kaba dang kumba shitaiew mynta ka la mad ia kaba kum kane hi kajuh.
Ka jingpynjulor u phria ka la pynlong ia kiba bun ki longiing ban duhnoh la ki jong ki iing ki sem bad ki la hap ban shu shna tang da ki iing dara ban shong ban sah shipor katba ka sorkar kam pat shim la pynpoi ia ki lad jingiarap ban pynmaramot lem ia ki iing jong ki. Haba iakren bad ki nongshong shnong hadien jong kane ka jingjia ki la ong ba ka jinghap u phria ka long kaba jur haduh katta katta haduh ba wat ki diengbah ruh ki la khyllem bad ym lah shuh ban kyrshan.
