Imphal, Ïaïong:
Ki bor sorkar jong ka jylla Manipur ha ka 4 tarik mynta u bnai ki la pyntip ba ki bor pahara ki la ïoh ban kem ïa uwei u dkhot jong ka seng kieng atiar Kangleipak Communist Party (KCP) bad kumjuh ruh uwei u dkhot jong ka People’s Liberation Army (PLA). Kat kum ka jingïathuh jong ki bor sorkar, ki la pyntip ba kitei ki 2 ngut kiba la shah kem ki dei ki runar kiba ju donkti ha ki kam dawa pisa beaiñ ha ka thaiñ ba shathie jong ka jylla Manipur.
Ki bor sorkar ki la pyntip ba ïa kitei ki 2 ngut ki runar la ïoh ban kem ha ryngkat 4 tylli ki mobile phone hadien ba ki bor pahara ki la leit ban pynlong ïa 2 tylli ki jingkhynra ha ka Lah Sngi U Blei ba la dep.
Kat kum ka jingpyllait kyrwoh jong ka tnat pahara la ïathuh ba hadien ki jingïoh lum jingtip ba tikna, ki bor pulit ka thaiñ Kakching lem bad ki bor shipai ka 37 Assam Rifles ha ka miet jong ka Sngi U Blei ba la dep ki la leit ban pynlong ïa ki jingkhynra bad ïoh ban kem ïa u dkhot jong ka KCP na kawei ka jaka rieh kaba don ha ka thaiñ Sekmaijin Heibong Makhong, Kakching district. U dkhot ka KCP u ba la shah kem ha katei ka sngi u dei u ba la tip kyrteng kum u Angom Ibochouba Singh (43 snem ka rta).
Na ka jingtohkit ïa utei u runar, ki bor pulit ki la lap ba utei Angom u la leit ban pynïasoh bad ka KCP ha u snem 2009 bad u la pyndep ïa ki jingshah ai jinghikai kilan met na kawei ka ktem jong ka seng kaba don ha ka thaiñ Ukhrul Upper Leishal Hill, Manipur ha u snem 2009.
Ki bor pulit ki la shem ruh ba u Angom u la trei ïa ki kam beaiñ jong ka seng hapoh ka jingkhmih bad jingpynïaid jong u Lamyanba Khuman – chairman ka KCP.
Sa ha kawei ka jingleit khynra, na ka liang ki pulit commando jong ka tnat pulit Manipur ki la ïoh ban kem ïa u dkhot jong ka PLA na ka thaiñ Nongpok Lourembam Mayai Leikai, Thoubal district. U dkhot ka PLA u ba la shah kem ha katei ka sngi (Lah Sngi U Blei) u dei u ba la tip kyrteng kum u Khoirom Ratan Singh (41 snem ka rta).
Na utei u runar, ki bor pulit ki la ïoh ban kurup ïa haduh 4 tylli ki mobile phone. Na ka jingtohkit pyrshah ïa u, la shem ba u la leit ban pynïasoh bad ka seng PLA ha u snem 2010 bad ïoh ruh ban bat ïa ka kyrdan kum u lance corporal jong ka PLA. U la trei ïa ki kam beaiñ jong ka seng hapoh ka jingkhmih bad jingpynïaid jong u Ronel – commander ka PLA.
Kat kum ka jingïathuh jong ki bor pulit, ki la pyntip ba u Khoirom u dei u runar u ju donkti ha ki kam ban dawa bad lum pisa beaiñ na ki nongkhaïi bad ki nongshong shnong jong ka thaiñ Thoubal district, Manipur.
