Gangtok, Iaïong:
U Myntri Rangbah barim jong ka jylla Sikkim, u ba dei ruh u nongïalam jong ka seng saiñ pyrthei Sikkim Democratic Front (SDF), u Pawan Cham ling ha ki khyndiat sngi kiba la leit noh u la kam ba ki bor ba halor jong ka sorkar ki la donkti ban pyndonkam bakla bad ktah matïong ïa ki kyndon jong ka Article 371F.
Ha ka jingïakren bad ki lad pathai khubor, na ka liang u Changling u la ong ba ki nongshong shnong jong ka jylla Sikkim ki la shah shet kylla namar ba ki don ki bor kiba halor kiba la pyndonkam bakla bad iuh roit ïa ki kyndon jong ka Article 371F.
Kum ban shu ïathuh hangne, la ïathuh ba ka Artice 371F jong ka Konstitushon jong ka ri India ka dei kawei na ki kyndon aiñ kaba ai jingïada ba kyrpang na ka bynta ki nongshong shnong ba tynrai jong ka jylla Sikkim.
Kat kum ki kyndon jong ka Article 371F, tang kito ki nongshong shnong jong ka jylla Sikkim (kiba shong ba sah ha Sikkim hashwa ka jingpynïasoh bad ka ri India) kiba ki kyrteng la pynrung ha ka thup lum kyrteng jong u snem 1961 ki dei ki Sikkimese kiba don ryng kat ka hok ban long trai ïa ki jaka ki puta bad kumjuh ruh ban ïoh ïa ki kam ki jam jong ka sorkar jylla. La pyllait ruh ïa ki na ka jingdonkam ban siew ïa ka ‘income tax’.
Ha ka jingïakren bad ki lad pathai khubor, na ka liang u Chamling u la ong ba ha kane ka por kaba mynta, kat kum ka Financial Bill, 2023 la batai bad pynithuh ba ki Sikkimese ki lah ban dei kino kino ki nongshong shnong jong ka ri India kiba shong ba sah ha Sikkim, bad kiba ïoh ïa ki lad jingmyntoi kumba ïoh lang ki nongshong shnong trai muluk jong ka jylla kiba ki kpa ki kmie tymmen jong ki ki don ha ka thup kyrteng jong u snem 1961.
U Chamling u la ïathuh ba ka Financial Bill, 2023 ka pynkheiñ ïa ki kyndon jong ka Article 371F kaba dei kawei na ki nongrim jong ka jingpynïasoh jong ka Sikkim bad ka ri India ha u snem 1975.
U la ïathuh shuh shuh ba ki nongshong shnong trai muluk jong ka jylla Sikkim ki la shah shet kylla namar la knieh jyndat bad iuh roit ïa ki katto katne ki jingmang kyrpang jong ki.
Halor kitei kiei kiei baroh, na ka liang u Chamling u la dawa ruh ba dei ban pynjari noh da ka President’s Rule ha ka jylla Sikkim.
U la pyntip shuh shuh ba ka jingpyntrei kam ïa ka President’s Rule ha ka jylla Sikkim ka long kaba donkam kyrpang khnang ba ïa ka ilekshon sha ka Ïing Dorbar Thaw Aiñ jong ka jylla Sikkim yn lah ban pynlong ha ka lynti kaba ïaid beit ïaid ryntih.
Ïa katei ka jingdawa, u Chamling u la pynsawa bad pyntip ruh ba ka jylla Sikkim ka la kylla long kum kawei na ki jylla kaba jur bha ha ki kam ïakajia kiba mih na ki kam saiñ hima sima.
U la kynnoh shuh shuh ba ki kam ïakajia kiba mih na ki kam saiñ pyrthei ki la jur bha ka jylla Sikkim naduh ba ka seng Sikkim Krantikari Morcha (SKM) ka la ïoh ban synshar ïa ka jylla ha u snem 2019 bad kane ka la pynshem jingeh bha ia ki nongshong shnong kane ka jylla.
Shuh shuh ula ban jur ruh da kaba ong ba dei tang da jingsynshar Presi dent Rule ba kane ka jylla lehse kan sa iaid ha ka lynti ba dei bad kumjuh ruh ha ka suk ka saiñ.
