Agartala, Iaïong:
Ki la don kumba san ngut ki poiwir Rohingya kiba la shahkem ha ki pulit ha Khowai distrik jong ka Tripura.
Kine ki san ngut ki Rohingya ki la shahkem na ka jaka sangeh rel kaba ha Teliamura kaba don ha Khowai distrik jong ka Tripura.
Kine kiba la shah kem ki kynthup ïa i khynnah ba dang 2 snem bad kawei ka longkmie.
Kine ki briew ki la shahkem ha ka por ba la don ka jingpahara bad ka jingkhmih bniah ba la pynlong da ki pulit ka tnat Government Railway Police (GRP) bad ki shipai ka tnat Border Security Force (BSF). Kine kiba la shahkem kem ki la poi ha Agartala kaba don ha Tripura ha ki lai sngi ba la leit.
Kine ki briew ki la shah kem katba ki dang shong ha ka rel kaba thmu ban leit sha Bengaluru.
Hashwa kata ha ka 9 tarik, Ïaïong, ki la don kumba 16 ngut ki briew kynthup ïa 10 ngut ki Rohingya kiba la shahkem ha ki shipai ka tnat Railway Police Force (RPF) ha ka jaka sangeh rel kaba don ha Agartala ha Tripura halor ka jingshah pynshisha ba ki la rung beaiñ hapoh ka ri.
Kine ki briew kiba la shahkem ha kine ki sngi ki dei kiba la tip kyrteng kum u Md Rashid, Farmin Begum, Md Osman, Khairul Amin bad iwei i khynnah rit.
Ki pulit jong ka Tripura ki la ong ba kine ki briew ki la ïaid lyngba u International Border lyngba ka thaiñ Bishalgarh kaba hap hapoh ka Sepahijala distrik jong ka Tripura.
