Dibrugarh, Iaiong:
Ka seng Bharatiya Janata Party (BJP) kan sa ïoh ban rah ïa ka nam jop 12 na ki 14 tylli ki jaka/thaiñ ha ka ilekshon Lok Sabha ka ban sa pynlong ha ka jylla Assam ha u snem u ban sa wan (2024). Ïa katei la pynbna da u Myntri ka Tnat Kam Pohïing jong ka Sorkar Pdeng – Amit Shah ha ka sngi kaba u la leit ban ïashim bynta bad ai jingkren ha ka jingïalang paidbah kaba la pynlong ha nongbah Dibrugarh ha ka 11 tarik mynta u bnai.
Haba ai jingkren ha katei ka jingïalang paidbah, na ka liang u Amit Shah u la kob ruh ba ka seng BJP kan sa ïoh biang ïa ka kabu ban ïoh bat ïa ka bor synshar hadien ka ilekshon Lok Sabha ka ban sa pynlong ha u snem 2024.
Ha ka jingai jingkren jong u, u la ong ruh ba u Narendra Modi un sa ïoh bat biang ïa ka shuki kum u Myntri Rangbahduh jong ka ri India ha ka sien kaba lai (3). U la kob shuh shuh ba ka seng BJP ha ka ilekshon Lok Sabha ka ban sa long ha u snem 2024 kan sa ïoh rah ïa ka nam jop na palat 300 tylli ki jaka/thaiñ. U la ong ba u Narendra Modi un sa ïoh ban bat biang ïa ka shuki Myntri Rangbahduh jong ka ri ha ka sien kaba lai (3) bad ka BJP kan sa ïoh ban rah ïa ka nam jop na palat 300 tylli ki thaiñ/jaka.
Ha ka jingai jingkren jong u Myntri, u la pashat ruh halor ka mat kaba ïadei bad ka jingmad nam rem ba dang shen jong ka seng Congress ha ki ilekshon Ïing Dorbar Thaw Aiñ jong ka jylla Tripura, Meghalaya bad Nagaland. U la ong ba dei na ka jingïohi jong u Myntri Rangbahduh ba ka Thaiñ Shatei Lam Mihgni jong ka ri mynta ka la ïoh mad biang ïa ka jingsuk bad sdang ban kynjah ha kaba ïadei bad ki kam beaiñ jong ki seng kieng atiar bapher bapher. Nalor ka jingsuk, ka thaiñ ka la kiew kyrdan ruh halor ki liang kiba ïadei bad ka roi ka par bad ka ïoh ka kot.
Ha ka jingai jingkren jong u Myntri, u la ong ruh ba mynshwa ka jylla Assam ka dei ka jylla kaba bna nam ha ka liang ki kam beaiñ jong ki seng kieng atiar bad jingjyllei jong ki jingïakhih; hynrei mynta ka jingsuk ka la wanphai biang bad ki nongshong shong ka jylla ki la sdang ban shad bad kmen ha ryngkat ka rong ka taw jong ka lympung Bihu.
U la ïathuh shuh shuh ba na ka jingwanphai biang ka suk ka saiñ ha ka jylla Assam, ka Sorkar Pdeng ka la weng ruh ïa ka jingpyntreikam ïa ka Armed Forces Special Powers Act (AFSPA) na kumba 70% ki jaka jong ka jylla Assam.
U la ïathuh shuh shuh ba ka thaiñ Bodoland bad ka thaiñ Karbi Anglong mynta ki la dei ki thaiñ kiba shong suk shong saiñ bad kumjuh ruh ha kaba ïadei bad ki kam ïakajia khappud bad kiwei kiwei ki jylla jong ka thaiñ shatei lam mihngi la sdang ban lah weng ïa ki jyrwit jyrwat kiba ïadei bad ki kam pynbeit ïa u pud u sam.
