Kohima, Iaiong:
U AK Mishra, uba long u ksiang jong ka Sorkar India ha ka jingkren ïasuk halor ki mat kiba ïadei bad ki kam saiñ hima sima jong ka jylla Nagaland, u la pynkhreh ban wan ïuh kjat ha ka jylla Nagaland na ka bynta ban ïakynduh ïa ki nongïalam ba hakhmat duh jong ka seng NSCN-IM ha nongbah Dimapur.
Kat kum ki jingïoh lum jingtip la ïathuh ba ïa ka jingïalang hapdeng u AK Mishra bad ki nongïalam jong ka seng NSCN-IM ha ka nongbah Dimapur yn sa pynlong ha ka 13 tarik mynta u bnai bad ïa ka seng NSCN-IM yn sa ïalam da u Thuingaleng Muivah.
Katei ka jingïalang kaba kyrpang tam kaba dei na ka bynta ban pynbeit ïa ki kam saiñ hima sima jong ka jylla Nagaland yn sa pynlong ha Chumouk edima police complex kaba don ha ka nongbah Dimapur, Naga land.
Katkum ki jingïoh lum jingtip la ïathuh ba ka nongrim kaba ka Sorkar Pdeng ka ïeng halor ki mat kiba ïadei bad ka jingdawa ban ïoh ïa la ka jong ka lama bad ka Konstitushon yn lah ban mynjur ha ryngkat ki katto katne ki kyndon – ka lama Naga na ka bynta ka Pan Naga cultural body bad ban jer kyrteng ïa ka soskular ïasngewthuh jingmut kaba khatduh (final agreement) kum ka Naga “Yehzabo”.
Ha kawei ka liang, ka NSCN-IM la ïathuh ba ka dang pynneh hi triang kat kum ka nongrim kaba ka la ïeng kat kum ka Framework Agreement kaba la soi ha ka 3 tarik u Nailar, 2015.
Ha ka jingwan jngoh jong u Mishra ïa ka jylla Nagaland la ïoh jingtip ruh ba un sa leit ban ïakynduh ruh ïa ki nongïalam bad ki dkhot jong kiwei kiwei ki civil society organization.
