Aizawl, Iaïong:
U Myntri Khynnah ka Sorkar Pdeng u ba dei khmih ïa ka tnat Development of North Eastern Region (Do NER) – BL Verma ha ki khyndiat sngi kiba la leit noh u la leit ban jurip ïa ki kam ki jam kia ïadei bad ka jingpyntrei pynbha bad pynïar ïa ka kad liengsuiñ ha ka shnong Lengpui, Mizoram.
Ïa ka projek na ka bynta ban pynbha bad pynïar ïa katei ka kad liengsuiñ la pyntrei hapoh ka jingïoh ïa ka jingsynniang pisa kaba hapoh ka North East Special Infrastructure Develop ment Schemes (NESIDS) ha ka dor kaba la kot shaduh ka T.19.59 klur.
Ha ka sngi kaba u Myntri u la leit ban jngoh ïa katei ka kad liengsuiñ, la ïathuh ba na ka liang ka jong u, u la ïoh ïa ka jingbatai kaba bniah halor ki mat kiba ïadei bad ka jingtyllun jong ki kam ki jam ban pyntrei ïa katei ka projek, ki jingeh kiba ïakynduh ha ka jingpyntrei ïa ka projek bad kumjuh ruh halor ki mat kiba ïadei bad ka por ba yn sa lah ban pyndep noh ïa katei ka kad liengsuiñ.
Ha ka jingleit jurip jong u Myntri u la pyntip ba namar ba ïa ka mang tyngka baroh la pyllait na ka bynta ban pyntrei ïa katei ka projek, kumta dei ban pyntyllun ïa ki kam ki jam kham sted khnang ba yn lah ban pyndep noh ïa ka ha ka por kumba la buh ba dei ban pyndep.
Shuh shuh hadien ba u Myntri u la ïoh jingtip ba ïa ka projek la pynjlan ïa ka por ban pyndep na u Lber, 2023 sha u Nohprah, 2023 u la kyntu ïa ki bor sorkar kiba dei khmih ba ki dei ban pyndep noh ïa katei ka projek liengsuiñ ha u bnai Risaw, 2023 – khnang ba kan long ka jingkyrkhu ïa ki nongshong shnong jong ka jyllla hashwa ban pynlong ïa ka ilekshon sha ka Ïing Dorbar Thaw Aiñ jong ka jylla kaba la buh ban pynlong hashwa ban kut une u snem u ba mynta.
Ha ka jingleit jngoh jong u Verma ïa ka jylla Mizoram, u la leit ruh ban khmih ïa bun tylli ki projek kam pynroi kiba la pyntrei ha ka thaiñ Mamit District – kaba dei ka ‘aspirational district’ jong ka jylla Mizoram.
