Aizawl, ïaïong:
Ka Special Court (Prevention of Corruption Act) jong ka nongbah Aizawl ha ki khyndiat sngi kiba la leit noh ka la daiñ kuna haduh T.4 lak ïa u CEO barim jong ka Mizoram Khadi and Village Industries Board (MKVIB) -Lalsawmzuala na ka daw jong ka jingdonkti jong u ha kawei ka kam bam sap.
Utei u CEO barim jong ka MKVIB u la shah tian bishar ha ka ïing kashari da kaba shah pynngat hapoh ka kyndon aiñ sections 409 bad 477A jong ka Indian Penal Code na ka daw jong ka jingdonkti jong u ban pyndonkam bakla ïa palat 9 lak ka pisa kaba la mang kyrpang na ka bynta ka jingpyntreikam ïa ka ‘Swarojgar Credit Card’ (SCC) bad kumjuh ruh na ka daw jong ka jingdonkti jong u ban pyndonkam bakla ïa ka pisa kaba la kot haduh T.9 lak kaba hapoh ka Rural Employment Generation Programme. Utei u CEO barim ka MKVIB u la donkti ha kitei ki kam bam sap da kaba pyndonkam bakla ïa ka bor/kyrdan jong u bad kumjuh ruh da kaba shon tuh ïa ki bill kiba lamler.
Katkum ka jingtian bishar jong ka ïing kashari, la ïathuh ba lada utei u CEO um shym la lah ban siew ïa ka kuna, un hap hapoh ka jingshah set phatok ka ban neh haduh kumba 2 bnai lynter.
Kat kum ka rai jong ka ïing kashari la ïathuh ruh ba utei u CEO u ba rim jong ka MKVIB u dei u heh sorkar u ba la noh ka rta bad kumjuh ruh u ba la sdang ban don ki jingthut ha ka liang ka koit ka khiah bad na ka liang ka jong u un nym lah ban neh slem lada un shah set phatok bun bun snem.
Shuh shuh la pyntip ruh ba utei u CEO mynshwa um pat shym la donkti satia ha kino kino ki kam beaiñ.
