Agartala, Ïaïong:
Ka jingkieng ïateh lok (Friendship Bridge) hapdeng ka ri India bad ka ri Bangladesh kaba la ju tip kyrteng kum ka Maitri Setu kaba don ha ka thaiñ Sabroom jong ka jylla Tripura yn sa lah ban pyntreikam noh ha u bnai Jylliew jong une u snem u ba mynta. Ïa katei la pynbna da u Chairman jong ka Land Port Authority of India (LPAI) – Aditya Mishra ha ka sngi Palei ba la dep hadien ba u la leit ban khmih ïa ka thaiñ Sabroom.
Ka kynhun ba 5 ngut jong ki ‘riew pawkhmat hapoh ka jingïalam jong u High Commissioner of Bangladesh (Delhi) – Mustafizur Rahman ki la leit ban jngoh ïa ka Bharat-Bangla Maitri Setu ha ka thaiñ Sabroom ha ka por kumba 11 AM ha ka sngi Palei ba la dep. Katei ka kynhun ki ‘riew pawkmat ka kynthup ïa u Myntri ka Tnat Korbar Ri jong ka ri Bangladesh – Ariful Rahmam, U Myntri ka Tnat Khaïï Pateng jong ka ri Bangladesh – AKM Atiqul Haque, bad U High Commissioner jong ka ri Bangladesh ha ka nongbah Agartala – Arif Mohammad.
Na ka liang ka sorkar India la leit ban mihkhmat da u Chairman jong ka Land Port Authority of India -Aditya Mishra, Director (Technical) ka LPAI – Lt. Col. Geetsab bad kiwei kiwei ki heh ophisar kiba don bynta ha ka jingpyntreikam ïa ka Integrated Check Post. Ha katei ka sngi la leit ban ïadon lang ruh da u MLA ka tahiñ – Shankar Roy.
Ha ka por kumba 11 baje, katei ka kynhun ki ‘riew pawkhmat ka la leit ban jurip ïa ka jaka ba la pyntrei ïa ka Maitri Bridge bad ïa ka ICP ha ka shnong Sabroom.
Na ka liang ki riew pawkhmat kiba la mihkhmat na ka bynta ka ri India bad Bangladesh ki la ïakren ïasyllok halor ki mat kiba ïadei bad ka kam ki jam baroh kiba sah kiba ïadei bad ka jingpyntreikam ïa katei ka projek.
Na ka liang u High Commissioner of Bangladesh in Delhi – Mustafizur Rahman u la ai ïa ka jingïaroh kaba khraw ïa ki kam kiba ka ICP ka la lah ban pyntrei. Ha katei ka sngi, na ka liang ki nongmihkhmat jong ki 2 liang mamla ki ri ki la ïa rai ba ha ki 2 bnai ki ban sa wan, ïa ki jingai jingmut kiba donkam dei ban leit pynpoi sha ki tnat korbar ri jong baroh 2 tylli ki ri.
Kum ban shu ïathuh hangne, ka jingkeing Maitri Setu ka jrong kumba 1.9 km bad ka pynïasoh ïa ka thaiñ Sabroom (India) bad ka Chittagong Port (Bangla desh) – kaba jngai kumba 80 km eiei.
Ïa u mawnongrim na ka bynta ban shna ïa kaei ka jingkieng la leit ban plie da u Myntri Rangbah duh jong ka ri India – Narendra Modi bad ka Myntri Rangbah duh jong ka ri Bangladesh – Sheikh Hasina ha u bnai Lber jong u snem 2021.
