Imphal, Ïaïong:
Ki nongïalam jong ki balang bapher bapher jong ka jylla Manipur ha ki khyndiat sngi kiba la leit noh ki la shim ïa ki sienjam ban ïeng tylli kawei na ka bynta ban ïakhun pyrshah ïa ki kam be-aiñ kiba ïadei bad ki kam rep be-aiñ ïa ki ‘tiew poppy ha ka jylla Manipur khamtam ha ki distrik rilum bapher bapher jong ka jylla.
Kat kum ki jingïoh lum khubor la ïathuh ba ha ka 14 tarik mynta u bnai na ka liang ka All Manipur Christian Organization (AMCO) ka la pynlong ïa ka rynsan ïasyllok bad pynsngewthuh paidbah halor ki mat kiba ïadei bad ki jingsniew kiba mih na ki jingpyndonkam ïa u drok bad kumno ba u la ktah jur ïa ka imlang sahlang jong ka jylla Manipur. Ïa katei ka rynsan la pynlong ha Sangai Hall jong ka Imphal Hotel.
Ha katei ka rynsan la wan ban ïashim bynta lem da ki nongïalam bapher bapher jong ki balang kiba na kylleng ki bynta jong ka jylla. Ha katei ka rynsan, la wan ruh ban ïashim bynta da u President jong ka AMCO – Reverend L Simon Raomai kum u Kongsan ha katei ka rynsan.
Ka mat kaba hakhmat eh ba la pynlong ïa katei ka rynsan ka long ban pynsngewthuh paidbah bad kumjuh ruh ban ai bynta ha ki nongtrei kam jong ki balang bapher bapher ki ban trei na ka bynta ka bha ka miat jong ka imlang ka sahlang ha ki thaiñ rilum jong ka jylla – kiba dei ruh ki thaiñ kiba ka kam rep beaiñ ïa u ‘tiew poppy ka jur bha.
Haba ai jingkren ha katei ka rynsan, na ka liang u Reverend L Simon u la ong ba ka balang ka don ïa ka kamram kaba kyrpang ha kaba ïadei bad ki sienjam ban rat dyngkhong ïa ki kam rep be-aiñ ïa u ‘tiew poppy ha ki thaiñ rilum jong ka jylla Manipur.
Na ka liang u nongïalam jong ka AMCO u la kynthoh ruh ïa ki sienjam jong ka Sorkar Jylla ha kaba ïadei bad ki kam ban rat dyngkhong ïa u drok na ka jylla Manipur, da kaba batai ba ka sorkar jylla ka khmih bniah bad shim kyrpang tang ïa ki thaiñ kiba don ha ka nongbah Imphal bad ha ki katto katne ki bynta jong ka thaiñ ri them jong ka jylla – da kaba klet bad ieh noh ïa ki thaiñ rilum jong ka jylla.
Ha katei ka rynsan, la pynmih ruh ïa ka rai ba ki nongïalam jong ki balang bapher bapher ba kin shim ïa ki sienjam kiba kyrpang – ban ïatrei ryngkat lang kawei na ka bynta ban rat dyngkhong ïa ki kam rep be-aiñ ïa u ‘tiew poppy ha ki thaiñ rilum jong ka jylla.
Ha katei ka rynsan, ka la don ruh ka jingïasyllok kaba bniah halor ki mat kiba ïadei bad ka jingshah ktah jong ka jylla na ki kam rep beaiñ ïa u ‘tiew poopy, khamtam ïa ka lawei ka ban sa wan.
Na ka liang ki nongïalam balang ki la shim da kawei ka rai ban ïatreilang kawei – ban ïasnohkti lem kawei ban pynsngewthuh ïa ki nongshong shong ki thaiñ rilum jong ka jylla ba kin ieh noh ïa ki kam rep beaiñ ki jong ki bad kumjuh ruh ba kin phai khmat sha kiwei kiwei pat ki kam rep kiba dei na ka bynta ka bha ka miat jong ka jylla bad kumjuh ruh na ka bynta ki nongshong shnong jong ka jylla hi baroh kawei.
