Dibrugarh, ïaiong:
Ki bor sorkar jong ka jylla Assam ha ka 13 tarik mynta u bnai ki la ïathuh ba ha ka jingleit khynra jong ki bor pahara ka Khonsa Batta lion jong ka tnat shipai Assam Rifles ha ryngkat ka jingïatreilang bad ki bor pulit jong ka jylla Arunachal Pradesh ki la ïoh ban kem ïa ki 2 ngut ki dkhot jong ka seng kieng atiar ULFA-I. Ïa ka jingleit khynra la leit ban pynlong ha ka sngi Palei kaba la dep.
Ki 2 ngut ki dkhot jong ka ULFA-I kiba la shah kem ha katei ka sngi ki kynthup ïa u 2nd Lieutenant – Ranju Asom bad u Private – Orindom Asom – kiba dei baroh 2 ngut ki nongshong shnong jong ka jylla Assam.
Kat kum ki jingïoh lum khubor la ïathuh ba na ka liang ki bor shipai ka Khonsa Battalion na ka tnat shipai Assam Rifles lem bad ki bor pulit na ka thaiñ Tirap ki la leit ban pynlong ïa ki jingkhynra ha ka step phyrngap jong ka 13 tarik mynta u bnai.
Ïa kitei ki 2 ngut ki dkhot jong ka ULFA-I la ïoh ban kem na kawei ka jaka rieh tngen kaba don ha ka shnong Horu Chinghan. Kat kum ka jingïathuh jong ki bor pulit ki la pyntip ba ka jingshah kem jong kitei ki 2 ngut ki dkhot jong ka ULFA-I ka la jia ruh ha ka por ba ka seng ULFA-I ka dang pyrshang ban pynïar bad pynkhlaiñ ïa ki lad treikam ba beaiñ jong ka seng ha ka thaiñ ba shatei jong ka jylla Assam.
Kat kum ka jingïathuh jong ki bor pulit ki la pyntip ruh ba ha une u snem u ba mynta, na ka liang ki bor pahara jong ka jylla ki la ïoh ban kem ïa bun ngut ki dkhot jong ka seng ULFA-I na ki thaiñ ba shatei jong ka jylla Assam bad kumjuh ruh na ka thaiñ Tirap, Longding bad Changlang (TLC) jong ka jylla Arunachal Pradesh – bad katei ka la pyntroiñ shi katdei ïa ki kam beaiñ jong ka seng ha kitei ki thaiñ.
