Guwahati, Ïaïong:
Ha ka 16 tarik mynta u bnai, ki bor sorkar jong ka jylla Assam ki la pyntip ba ïa ka metïap jong uwei u runar uba ju donkti ha ki kam ban pynïap beaiñ ïa ki kyndad la lap ba ka la per ha ka wah bah Brahmaputra.
Kat kum ki jingïohlum khubor la ïathuh ba ka metïap kaba la lap na ka wahbah Brahmaputra, Assam ka dei ka jong uwei u runar u ba la tip kyrteng kum u Saidul Islam – u runar u ba la lait phet ruh na ka kti jong ki bor pulit ka jylla hadien ka jingshah kem.
La ïathuh ba u Saidul Islam u la lait phet na ka kti jong ki bor pulit ha ka 14 tarik mynta u bnai, hadien ba ki bor pulit jong ka jylla ki la leit ban ïalam ïa u sha Bagori range, Kaziranga National Park na ka bynta ban batai bad pyni ïa ka jaka kaba u la donkti ban pynïap ïa uwei u kyndad.
Kat kum ka jingïathuh jong ki bor pulit, ki la pyntip ba u Saidul Islam u dei u nongshong shnong ka thaiñ Lahorighat, Nagaon district jong ka jylla Assam.
Kum ban shu ïathuh hangne la ong ba na ka liang ka kynhun Special Task Force (STF) jong ka tnat pulit Assam naduh u snem ba la dep ka la pynsdang ïa ki kam khynra kiba jur pyrshah ïa ki runar/kynhun runar kiba ju donkti ha ki kam ban pynïap beaiñ ïa ki kyndad ha kylleng ki bynta jong ka jylla Assam; bad dei na katei ka jingleit khynra ka jong ka kynhun pulit STF ba ki la ïoh ruh ban kem ïa u Saidul Islam.
Na u Saidul, ki bor pulit SDF ki la ïoh ruh ban kurup ïa kawei ka reng kyndad kaba don ïa ka jingkhia kaba haduh kumba 750 gram.
Hynrei halor katei ka jingjia, la ïathuh ba ki don sa 3 ngut kiwei pat ki dkhot jong ka kynhun runar kiba la lait ban phet da ka said.
