Silchar, Ïaïong:
Ki bor pulit jong ka jylla Assam na ka thaiñ Karimganj District ha ka 16 tarik mynta u bnai ki la pyntip ba ki la ïoh ban kurup ïa bun bah u kynja na kawei ka trok kit siej kaba dang ïaid lyngba kawei ka thaiñ kaba don markhap bad ka jylla Tripura.
Kat kum ka jingpyllait kyrwoh jong ka tnat pulit, la ïathuh ba ïa utei u kynja la ïoh ban kurup da ki bor pulit na ka shnong Churaibari kaba don ha ka thaiñ Karimganj District jong ka jylla Assam.
Na ka liang ka tnat pulit ka la pyntip ruh ba na katei ka trok kit siej, ki la ïoh ban kurup ïa haduh 1,420 kilo u kynja u ba ki runar ki dang thmu ban leit pynpoi sha ka thaiñ Bareilly, Uttar Pradesh na ka nongbah Agartala, Tripura lyngba ka thaiñ Karimganj, Assam.
Ha katei ka jingjia, na ka liang ki bor pulit ki la ïoh ruh ban kem ïa u nongñiah jong katei ka trok u ba la tip kyrteng kum u Deepak Kumar – u nongshong shnong ka jylla Bihar.
Halor katei ka jingjia la ïathuh ba ïa utei u runar lem bad ïa u kynja bad ka kumjuh ruh ïa ka trok la leit ban aiti noh sha ki bor pulit ka thaiñ, khnang ba kin pynlong ïa ki jingtohkit kiba dang sah.
