Kohima, Ïaïong:
Ka kynhun pahara jong ka tnat shipai Assam Rifles ha ka 16 tarik mynta u bnai ka la ïoh ban kem ïa ki 2 ngut ki dkhot jong ka seng kieng atiar NSCN-IM na kawei ka shnong kaba don ha ka thaiñ Mokokchung District, Nagaland.
La ïoh ban kem ïa kitei 2 ngut hadien ba ki bor shipai ki la leit ban pynlong ïa ka jingkhynra bad talasi ha katei ka thaiñ.
Ïa ka jingshah kem jong kitei ki 2 ngut la pynbna paidbah da u PRO (Defence) jong ka nongbah Kohima bad Imphal ha ka Sngi U Blei ba la dep.
Kat kum ka jingpyllait kyrwoh jong u PRO, u la pyntip ba ïa ka jingleit khynra ha katei ka sngi la leit ban pynlong hadien ka jingïoh ïa ki jingtip kiba bniah na ki tnat syntiat halor ka jingdon jong ki dkhot ka NSCN-IM kiba ïaid ba ïeng ha ka surok Mokokchung – Mariani, ha ryngkat ka jingdonkti ban byrngem byrsit bad dawa pisa beaiñ ruh na ki nongshong shnong jong ka thaiñ.
La ïathuh ba ha katei ka jingleit khynra ka jong ki, ki la ïoh ban pynsageh ïa kawei ka kali Maruti Alto, hynrei ki runar kiba shong hapoh jong katei ka kali ki la lait phet da ka said bad leit ban rieh ha kawei ka ïing kaba don marjan bad katei ka surok bah.
Halor katei, na ka liang ki bor pahara ki la pynlong da ka jingker sawdong ïa katei ka ïing bad hadien ka jingleit khynra ki la ïoh ban kem noh ïa ki 2 ngut ki dkhot jong ka NSCN-IM.
Ki 2 ngut ki dkhot ka NSCN-IM kiba la shah kem ha katei ka sngi ki kynthup ïa u Sergeant Major Imkong tiba bad u Sergeant Major Phamching.
Na kitei ki 2 ngut, ki bor pahara ki la ïoh ruh ban kurup ïa 2 tylli ki tiar siat bad uwei u kuli bym pat shym la pyndonkam.
Hadien katei ka jingshah kem, la ïathuh ba ïa kitei ki 2 ngut lem bad ïa ki tiar siat ba la ïoh kurup la leit ban aiti noh sha ki bor pulit ka Mokokchung Police Station-I khnang ba kin pynlong ïa ki jingtohkit kiba dang sah.
