Agartala, ïaïong:
Ka sorkar Tripura ka la pynbna shuti haduh 6 sngi ia ki skul ba don ha katei ka jylla namar ka jingshit bad jingthang palat ka sngi. Ka khubor ba la ioh ka iathuh ba ka sorkar naduh ka sngi ba-ar mynta ka taiew ka la ai shuti ia baroh ki skul namar ka jingshit kaba palat bad ka la dep ruh ban phah jingtip ha kaba iadei bad kane sha baroh ki skul kiba don ha kane ka jylla.
Kawei na ki daw halor ka jinghap ai shuti ka sorkar ia ki skul ka dei ruh hadien ba la ai jingmut da ka tnat ka koit ka khiah kaba la iathuh ba tang namar kane ka jingshit palat bun ki khynnah ki la kem pang.
Nalor ki skul sorkar ka sorkar Jylla ka la kyrpad ruh wat ia ki skul jong ki riew shimet bad ki skul balang ba kin ai shuti lem haduh 1 taiew na ka bynta ki khynnah skul.
Ka Tripura ka la mad ia ka jingshit kaba shyrkhei bha ha kine ki khyndiat sngi ha kaba ka jingkiew jong ka jingshit ka la long haduh 39 bad 40 degree Celsius.
Namar ka jingjur palat ka jingshit bun ki briew kim shim nud satia ban mih na la ki jong ki iing ki sem tad haduh ynda la kham jem bad kham pyngngad khyndiat.
Ka India Meteorological Department (IMD),ka pynbna ba na ka daw jong ka jingwan beh ka Northwesterly ka jingshit bad jingtyrkhong ha ki bynta ka jylla North East kan sa jur bha ha kine ki khyndiat sngi.
Ka tnat ka koit ka khiah ka la ai jingmut ia ki paidbah ba kin ialeh ban kiar na ka sngi bad kum juh ruh ba kin tap da ki shatri lane tupia haba ki mih ban lait na ka jingshah thang ka sngi.
Namar ka jingjur palat ka jingshit la ong ba ka jingdie ia ki jingdih pyngngad kiba kynthup ki umsoh, Ice-Cream bad kiwei kiwei ki la iaid bha ha jylla Tripura mynta. Ka jingeh kaba mih ha jylla Tripura mynta na ka daw jong ka jingshit ka dei ruh ka jingkyrduh um ha kaba bun ki wah bad ki pung bad ki la sdang rngat lut.
