Agartala, Ïaïong:
U Justice Aparesh Kumar Singh uba dei ruh u nongïasaid aiñ jong ka Jharkhand High Court ha ki khyndiat sngi ba la leit noh u la leit ban bam smai ban shimti ïa ka kam kum u Chief Justice ba thymmai jong ka Tripura High Court.
Ïa ka jingïalang bam smai la pynlong ha ka step jong ka Lah Sngi U Blei mynta ka taïew ha Durbar Hall jong ka New Raj Bhavan.
La pynbamsmai ïa utei Chief Justice da u Lat ka Tripura u Satyadeo Narain Arya.
U Justice Aparesh Kumar Singh u la shimti ïa ka kam kum u Chief Justice ba thymmai jong ka Tripura High Court, da kaba mih bujli ha ka jaka jong u Justice Jaswant Singh uba dang shu dep ban shongthait shen.
Halor katei, na ka liang ka Tnat Justice jong ka Law Ministry ka la pynmih ïa ka jingpyntip paidbah da kaba batai ba ka President jong ka ri, hapoh ka bor ba la pynkhamti da ka Article 217 jong ka Riti Synshar ka la thung kam ïa u Justice Aparesh Kumar Singh, u ba dei u nongïasaid aiñ jong ka Jharkhand High Court, ba un shimti ïa ka kam kum u Chief Justice ba thymmai jong ka Tripura High Court bad katei kan trei kam naduh ka 17 tarik mynta u bnai.
Kat kum ki jingïoh lum jingtip la ïathuh ba ïa u Justice Singh la kha ha u Naitung jong u snem 1965 bad u la sdang ïa ki kam ïasaid aiñ jong u ha u snem 1990.
Ha ka jingïalang bam smai kaba la pynlong ha ka Lah Sngi U Blei ba la dep, la wan ban ïashim bynta lem da u Myntri Rangbah jong ka jylla – Dr. Manik Saha bad kumjuh ruh da ki Myntri jong ka Sorkar Jylla.
Kiwei kiwei ki heh ki haiñ kiba la wan ban ïashim bynta ha ka jingïalang bam smai ki kynthup ïa u Chief Secretary J K Sinha, DGP Amitabha Ranjan, Additional Director General of Police Sau rabh Tripathi bad kiwei kiwei.
La wan ban ïashim bynta lem ruh ha kane ka jingbam smai u Aparesh Kumar Singh da kiwei kiwei ki nongïasaid aiñ jong ka Tripura High Court ha ryngkat ka jing iadon lang ki bahaiing hasem jong u bad kumjuh ruh ki paralok parajor kiba la long ruh ki nongsakhi ia kane.
