Gangtok, Ïaïong:
Ka President barim jong ka Hamro Sikkim Party (HSP), ka Dr Bina Basnett ha kane ka taiew kaba mynta ka la pynpaw ïa ka jingsngewkhia bad ka jingsngewsih hadien ka jingïoh tam ïa ka metïap jong kawei ka khynnah rit na ka shnong Pangthang, ka shnong kaba don marjan bad ka nongbah Gangtok.
Kat kum ki jingïoh lum khubor la ïathuh ba ïa ka metïap jong katei ka khynnah rit la ïoh ban tam na kawei ka jaka khlaw kaba don ha ka shnong Pangthang bad katei ka jingjia ka la wanrah ïa ka jingsuhjer kaba jur hapdeng ki nongshong shong jong ka jylla.
Halor katei ka jingjia, na ka liang ka Dr. Bina ka la pyntip ba katba dang mih ki sngi ki por, ki kam beaiñ bad ki jingjia shah thombor jong ki khynnah rit ki la sdang ban kynrei bad kat kum ka kaiphod jong ka NCRB 2021, la lap ruh ba ka jylla Sikkim ka dei kawei na ki jylla kaba jur tam ha ka liang ka jingkynrei jong ki jingjia shah thombor beaiñ jong ki khynnah rit bad ki ‘riew kynthei.
Ka la ïathuh ba ha kine ki sngi kiba mynta, ka jylla Sikkim ka la ïoh ban mad ïa ki jingjia jong ka jingsdang ban kynrei jong ki kam shah rahbor, kam shah leh khlem raiñ bad kumjuh ruh kiwei kiwei ki kam thombor ba har rukom. Na ka liang ka Dr. Bina ha ka jingïakren bad ki lad pathai khubor ha ka Sngi U Blei ba la dep ka la buh ïa ka jingkylli shaei ka jylla kan ïaid lynti ha ka imlang ka sahlang haba kum kitei kin mokotduma ki dang ïai jia bad kynrei katba dang ïai mih ki sngi.
Na ka liang ka Dr. Bina ka la ïawer bad kyntu ïa ki kynhun imlang sahlang bad kumjuh ruh ïa ka sorkar jylla ba ki dei ban shim ïa ki sienjam kiba donkam kyrpang khnang ba yn lah ban tehlakam bad rat dyngkhong kum ïa kitei ki kam beaiñ kiba la pynhiar dor bad pynbudnam ïa ka jylla Sikkim bad kumjuh ruh ïa ki nongshong shnong ki jong ka. Na ka liang ka Dr. Bina ka la ong ba ki bor sorkar kiba dei khmih halor kitei ki jingjia ki dei ban shim ïa ki sienjam kiba kyrpang ban buddien halor kitei ki kam kiba la pynthohbria ïa ka jylla baroh kawei.
Ka la ong shuh shuh ba ki bor ba halor kim dei ban kynran dien tad haduh ban da ïoh ban kem ïa ki runar kiba donkti ha ki kam beaiñ – bad kumjuh ruh ban ai ha ki da ka jingshah pynshitom kaba tyngeh khang ba kan long kum ka jingmaham ïa kiwei kiwei pat ki runar.
Shuh shuh na ka liang ka Dr Bina ka la kyntu ïa ka sorkar jylla ba kan wanrah da ki lad ki lynti kiba thymmai khnang ba yn lah khmih bniah halor ki daw tynrai kiba wanrah ïa kum kitei ki jait jingjia shah thombor.
Ka la ong shuh shuh ba ka sorkar jylla ka dei ban ïatreilang ryngkat ba ki seng bhalang ne ki seng trei mon sngewbha bad kumjuh ruh ban ai rynsan lem ïa ki riew paidbah khnang ba kin lah ban shim ïa ki lad ki lynti na ka bynta ban wanrah ïa ki rynsan trei kam kiba dei na ka bynta ka bha ka miat bad ka suk ka saiñ jong ki khynnah rit, ban pynrung ïa ki sobjek kiba ïadei bad ka POCSO Act bad kiwei kiwei ki jait aiñ ha ki kad pule puthi jong ki khynnah/samla pule bad kumjuh ruh ban wanrah ïa ka rynsan trei kam ka ban lum jingtip halor ki mat kiba ïadei bad ki nongshong shnong kiba na Shabar jylla ki ba ki wan ban jngoh ïa ka jylla.
Na ka liang ka Dr. Bina ka la ong shuh shuh ba ki bor kiba halor ki dei ban khmih bniah bad lum da ka kaiphod kaba bniah ban khmih bad lum jingtip la ki runar kiba donkti ha ki kam beaiñ ki dei ki nongshong shnong kiba na ka jylla ne na shabar jong ka jylla; bad kumjuh ruh ban khmih bniah la ki runar kiba donkti ha kitei ki kam beaiñ ki dei kiba ju kynrei ha ki kam ban dih ïa ki kynja jingdih kiba pynbuaid.
