Dibrugarh, ïaïong:
Ki bor sorkar jong ka jylla Assam ha ka 19 tarik mynta u bnai ki la pyntip ba ka thaiñ Dibrugarh District ka la shah lynshop ha ka ka erïong kaba la wanrah ryngkat ïa ka jingpom pyrthat bad ‘lei lieh kaba jur, ha kaba u la don ruh uwei na ki nongshong shnong u ba la duh ei ïa ka jingim na katei ka jingjia.
Kat kum ki jingïoh lum jingtip la ïathuh ba katei ka jingjia ka la jia ha ka por kumba 4 baje mynstep bad ka la wanrah ruh ïa ka jingjulor kaba jur ha ka thaiñ. La ïoh jingtip ba ki la don bun tylli ki ïïng briew bad ki sem ri mrad kiba la shah pynjulor ha ka erïong kaba jur.
Ki thaiñ kiba la shah ktah jur eh na ka jingshah lynshop ha ka erïong ki kynthup ïa ka thaiñ Moran, Lahowal bad ka thaiñ Chabua.
Kat kum ka jingpyllait kyrwoh jong u District Project Officer (DPO) ka Assam State Disaster Management Authority (ASDMA) – Deepjyoti Hatikakoti u la pyntip ba ha katei ka jngjia shah lyshop erïong, kawei ka longkmie kaba la tip kyrteng kum ka Sukurara Mura (60 snem ka rta) na Tamulbari tea estate, Lahowal ka la duh ei ïa la ka jong ka jingim hadien ba uwei u dieng bah u la khyllem bad bhan ïa ka tnum ïing ka jongka.
Ha katei ka jingjia, la ïathuh ba ïa katei ka longkmie la leit ban rah sumar sha Assam Medical College and Hospital (AMCH) hynrei ka la khlad noh hashwa ban ïoh ïa ki jingsumar kiba janai.
Na katei ka jingjia shah lynshop erïong, la ïoh jingtip ruh ba ki la don ruh katto katne ngut kiwei pat ki nongshong shong jong ka thaiñ kiba la ïoh ïa ki jingsmynsaw kiba mau mala.
Kat kum ka jingïathuh jong u DPO, u la pyntip ba na ka liang ka tnat sorkar mynta ka dang pynlong ïa ka jinglum jingtip kaba bniah shaphang katei ka jingjia ban lap ba haduh katno ka thaiñ ka la shah ktah na katei ka jingjia. U la ïathuh ruh ba na ka liang ka tnat sorkar ka la leit ruh ban pynbiang ïa ki lad jingïarap sha ka longïïng jong katei ka longkmie kaba la khlad na katei ka jingjia.
U heh ka ASDMA u la pyntip shuh shuh ba ki la don bun tylli ki ïïng briew kiba la shah pynjulor ha katei ka jingjia, bad na ka liang ka tnat sorkar ka la pynsdang ïa ki kam lum jingtip khnang ba yn lah ban pynbiang ïa ki lad jingïarap sha kito ki longïïng kiba la mad ïa ki jingeh.
