Gangtok, Ïaïong:
Ha ka 19 tarik mynta u bnai da ki spah ngut ki nongshong shnong jong ka jylla Sikkim ki la leit ban ïashim bynta ha ka jingïaïaid paidbah ha katei ka nongbah ban pynpaw ïa ka jingpyrshah halor ka jingjia shah leh be-i-jot bad shah pynïap jong iwei i khynnah kynthei i ba dang 11 snem ka rta.
Ïa ka jingïaïaid paidbah ha katei ka sngi la pynsdang na ka thaiñ Amdo Golai ter ter shaduh ka surok Byepass kaba don ha ka nongbah Gangtok.
Na ka liang ki paidbah kiba la leit ban ïashim bynta ha katei ka jingïaïaid paidbah ki la dawa ruh na ka sorkar ba ka dei ban ai da ka ‘death penalty’ pyrshah ïa u runar u ba la donkti ha katei ka kam bymman. Kat kum ki jingïoh lum jingtip la ïathuh ba u runar u ba la donkti ha katei ka kam beaiñ u dei u ba la tip kyrteng kum u Pritam Sharma – u nongshnong tynrai ka jylla Bihar u bat rei kum u nongñiah kali ha Sikkim.
La ïoh jingtip ruh ba na ka liang ki bor pulit jong ka jylla Sikkim ki la ïoh ban kem ïa utei u runar u ba la donkti ha katei ka kam bymman.
Kat kum ki jingïoh lum khubor la ïathuh ba ïa ka metïap jong itei i khynnah rit la lap ha ka 14 tarik mynta u bnai, 3 sngi hadien ba i la jah rngai na la ka jong ka ïing. Utei u runar u la donkti ban leh ïa katei ka kam bymman ha kawei ka khlaw kaba don ha ka nongbah Gangtok.
Kat kum ki jingïoh lum khubor la ïathuh ba na ka liang utei u runar u la donkti ban rahbor ïa i khynnah rit katba i dang don ha lynti ban leit phai sha la ïing hadien ba la wai skul, bad hadien u la leit ban ïalam ïa i sha kawei ka khlaw ban leh ïa ka kam bymman. Hadien ka kam bymman la ïathuh ba na ka liang utei u runar u la ksih ïap ïa itei i khynnah rit da u ‘tie’ skul jong itei i khynnah hi.
Kat kum ki jingïoh lum jingtip la ïathuh ba na ka liang ki bor pulit jong ka jylla Sikkim ki la pynngat ïa utei u runar hapoh bun tylli ki section jong ka Indian Penal Code (IPC) badkumjuh ruh jong ka POCSO act.
