Amingaon,Ïaïong:
U Myntri Rangbah jong ka jylla Assam, u Himanta Biswa Sarma ha ki khyndiat sngi kiba la leit noh u la pyntip ba naduh u bnai Rymphang jong une u snem ba mynta, ki la don haduh 7 ngut ki nongshong shnong ka thaiñ Kamrup (Rural) District kiba la duh ei ïa la ki jong ki jingim bad 63 ngut kiwei pat kiba la ïoh ïa ka jingpang Hepatitis A.
Kat kum ki jingïoh lum khubor la ïathuh ba ha ka sngi Balang ba la dep, na ka liang u Myntri Rangbah u la leit ban jngoh ïa ka thaiñ Loco Colony bad leit ruh ban ai ïa ka khubor sngewlem sha ka longïing jong uwei u nongpang u ba la khlad ha katei ka sngi.
Na ka liang u Myntri Rangbah u la pyntip ba tad haduh kane ka kynti kaba mynta la dep ban ‘test’ ïa 402 tylli ki nongmuna bad la shem bad 62 ngut ki don ïa ka jingpang Hepatitis A. Kumjuh ha ka Sngi Balang ba la dep la shem shuh shuh ba ki la don 9 ngut kiba la ïoh ïa katei ka jingpang. La ïoh jingtip ba bun na ki briew kiba la ïoh ïa katei ka jingpang ki dei ki nongshong shnong kiba na ka thaiñ Amingaon jong ka distrik.
Halor ka jingsaphriang jong ka jingpang, na ka liang u Myntri Rangbah u la bthah ïa ki bor ba halor ba kin shim ïa ki lad ki lynti khnang ba yn lah ban tehlakam ïa ka jingsaphriang jong ka jingpang bad kumjuh ruh ban pynbiang ïa ki lad jingsumar kiba paka na ka bynta ki nongshong shnong kiba la ïoh ïa katei ka jingpang.
U Myntri Rangbah u la bthah ruh ïa ki bor pynïaid distrik ba kin pynlong ïa ki ‘medical health camp’ bad pyntip ruh ba ha kitei ki lympung yn sa wan ban ïashim bynta da ki doktor kiba na Gauhati Medical College Hospital.
Kat kum ka jingïathuh jong u Joint Director of Health Services ka Kamrup (R) District – Mohitosh Banerjee u la pyntip ba ha ki ar taiew kiba la leit noh ki la don haduh 4 ngut ki nongshong shnong ka thaiñ kiba la khlad hadien ka jingïoh ïa ka jingpang Hepatitis A. U la pyntip shuh shuh ba ka Hepatitis A ka dei ka jingpang kaba saphriang na ka jingtngit jong ka um bam um dih.
U la ïathuh shuh shuh ba ïa ki rynsan pynsgewthuh paidbah la pynsdang ha bun tylli ki thaiñ kiba la shah ktah ha katei ka jingpang bad na ka liang ki nongtrei ka tnat koit khiah ki la leit ruh ban jurip ïa ki ïing ki sem jong kitei ki thaiñ bad bthah ruh ïa ki nongshong shnong ba ki dei ban leit mih sha ki doktor lada ki don ïa ka jingpang shit met bad kiwei kiwei ki jait jingpang.
Ki katto katne ki thaiñ kiba la shah ktah na ka jingsaphriang jong ka jingpang Hepatitis A ki kynthup ïa ka Loco Colony, Madhyam Khanda, No 26 Colony, Hatat Colony, Kalibari, Srinathpatti bad ka thaiñ Moriyapatti.
Halor ka jingsaphriang jong ka jingpang, la ïathuh shuh shuh ba na ka liang u Deputy Commissioner Keerti Jalli u la pynlong ruh ïa ka jingïalang kaba kyrkieh bad ki heh sorkar ka North East Frontier Railways bad jong ka tnat Public Health and Engineering Department (PHED).
