Guwahati, Ïaïong:
Ka Press Information Bureau, Guwahati ha ka 21 tarik mynta u bnai ka la pynlong ïa ka Webinar halor ka “Untold Stories of the Freedom Struggle from North East India”, ka kot ba la thoh da u Nongthoh khubor ba la tbit bha bad u nongthoh kot u Dr.Samudra Gupta Kashyap. Ki nongïashim bynta ha kane ka webinar ki kynthup ïa ki nongthoh khubor na kylleng ka thaiñ shatei lam mihngi. Ïa ka ‘webinar’ la pynïaid da u B. Narayanan, Director General, North East Zone, Tnat Information and Broadcasting, Sorkar India.
Haba ai jingkren pdiang sngewbha u Narayanan u la ong ba ka webinar ka thmu ban ïa phylliew jingmut ia ki bynta ba kongsan jong ka kot ba la thoh da u Dr. Samudra Gupta Kashyap. U la ong ba kane ka kot ba la pynmih da ka Publications Division jong ka Tnat Information and Broadcasting ka dei ka jingpyrshang ban pyni ïa ki jinglenlade ba khraw jong ki nongïakhun laitluid jong ka thaiñ shatei lam mihngi.
Ka jingthmu ba kongsan jong kane ka ‘webinar’ ka long ban pynpoi ïa ki khana jong ki ‘riewshlur bym shym la paw pyrthei sha ki paidbah, u la bynrap. Haba kren shaphang kane ka kot, u Narayanan u la ong ba kane ka kot kan ïarap ïa ka pateng ban wan ban tip shaphang ki jingnohsynniang bad ki jinglenlade jong ki mongïakhun laitluid jong ka thaiñ.
Ha ka jingai jingkren jong u, u Dr.Samudra Gupta Kashyap u la ong ba kane ka kot ka peit bniah ïa ki jinglong ba shlur bad ki jinglenlade ki briew na kane ka thaiñ, da kaba wanrah jingshai halor ka jingnohsynniang jong ki sha ka jingïakhun laitluid jong ka ri.
U la ong ba ki khana jong ka jingieit ri bad ki jinglenlade jong ki nongïakhun laitluid jong ka thaiñ shatei lam mihngi ym shym la don jingthoh kiba la pynneh ha ka rukom kaba biang. Ka jingbym kynthup ïa ki khana jong ki jingïakhih pyrshah ia ka jingsynshar ki phareng jong ka thaiñ ha ki kot histori bad ki kot pule ka la ïalam sha ka jingngeit ba ka thaiñ shatei lam mihngi kam shym la don bynta eiei ha ka jingïakhun laitluid, u la bynrap. U la ong shuh shuh ba ka jingwanrah ïa ki khana na kylleng ka thaiñ shatei lam mihngi ka long kaba eh shisha namar ka jingbym don jingthoh ïa bun ki jingjia.
U Dr Kashyap u la kren shaphang ki kam jong kine ki riewshlur ba ieit ri kum u Maniram Dewan bad KushalKonwar jong ka Assam, Ranuwa Gohain jong ka Arunachal Pradesh, Tikendrajit jong ka Manipur bad kiwei kiwei. U la kren sani halor ka khana jong u Maniram Dewan, ka jingïakhun jong ka Saraighat, ka jingïakhih ki paidbah ha Phulaguri, ka bynta jong ki longkmie jong ka thaiñ shatei lam mihngi bad kiwei kiwei ha ka ‘webinar’ ba la pynlong ha katei ka sngi.
Ha kane ka ‘webinar’ la iadon lang ruh ki ophisar jong ka Press Information Bureau bad Central Bureau of Communication jong ka thaiñ shatei lam mihngi.
Ka kot ba la tip kum ka “Untold Stories of the Freedom Struggle from North East India” ka dei kaba la pynmih da ka Publications Division jong ka Tnat Information and Broadcasting, kum shi bynta ka ‘Azadi Ka Amrit Mahotsav’. Ka kot ka batai shaphang ki khana jong ka jingieit ri, ka jingshlur bad ki jinglenlade na kylleng ka thaiñ shatei lam mihngi bad kumjuh ruh ki jingïakhun bym shym la ïoh jingithuh ba ka thaiñ ka la ïakhun pyrshah ïa ki sahep Bilat kiba biang ki tiar ïakhun pyrshah.
