Imphal, Ïaïong:
Ka All Tribal Students’ Union Manipur (ATSUM) ha ki khyndiat sngi kiba la leit noh ka la pynpaw ïa ka jingpynrem bad jingpyrshah kaba jur halor ka hukum jong ka High Court jong ka jylla Manipur kaba la bthah ïa ka Sorkar Jylla ba kan pynrung noh ïa ki jaitbynriew Meitei ha ka thup Scheduled Tribe (ST) jong ka jylla.
Na ka liang ka ATSUM ka la kynthoh ba katei ka rai jong ka ïing kashari ka long pyrshah ïa ka jingthrang bad jingangnud jong ki nongshong shnong trai muluk jong ka jylla. Ka la pynbna ruh ba ka 19 tarik mynta u bnai (ka sngi ba la pynmih ïa katei ka rai) kan dei ka sngi kaba ki nongshong shnong trai muluk jong ka jylla kin ïai kynmaw shirta kum ka ‘Black Letter Day’.
Halor ka rai jong ka ïing kashari, la ïathuh ba na ka liang ka ATSUM ka la khot ruh ban pynlong da ka jingïalang kaba kyrkieh hapdeng ki seng samla trai muluk ban ïasyllok halor katei ka mat. Na ka liang ka seng ka la kynnoh ba ka jingdawa ban ïoh ïa ka kyrdan ST da ka jaitbynriew Meitei kaba dei ka kynhun jaitbynriew kaba la kiew la roi hajan ki liang baroh ka dei kawei na ki jingdawa kaba ym shym la don nongrim eiei bad kaba la wanrah ruh ïa ka jingkhih kaba jur hapdeng kiwei kiwei ki kynhun jaitbynriew trai muluk jong ka jylla kiba ïoh ïa ki lad jingïada na ka Konstitushon jong ka ri. Na ka liang ki nongïalam jong ka ATSUM ki la ong ba ka jaitbynriew Meitei kam shym la don hok satia ban ïoh rung ha ka thup kyrdan ST jong ka jylla. Na ka liang ki nongïalam jong ka ATSUM ki la pynrem ruh ïa ka sorkar jylla bad ong ba dei na ka jingkheiñ sting jong ka ba ka ïing kashari ka la pynmih ïa katei ka hukum.
Ki nongïalam ka ATSUM ki la pyntip ruh ba na ka liang jong ki, kiin shim ïa ki sienjam kiba kyrpang ban pynsngewthuh ïa ka sorkar jylla hashwa ba kan leit ban ai ïa ka jingmut sha ka Sorkar Pdeng. Ki la pyntip ruh ba na ka liang ka seng, kan dang ïai bteng ban pyrshah ïa ka jingdawa jong ka jaitbynriew Meitei ban ïoh ïa ka kyrdan ST.
Ha ka jingïalang kaba dang shu dep ban pynlong la ïathuh ba na ka liang ka HAC ka la pynmih ïa ka rai ban pyrshah ïa ka hukum jong ka ïing kashari ban bthah ïa ka sorkar jylla ban pynrung noh ïa ka jaitbynriew Meitei/Meetei ha ka thup ST jong ka Konstitushon jong ka ri India. Na ka liang u chairman ka HAC – Dinganglung Gangmei u la kynnoh ba ka ka HAC kaba dei ka Constitution body of Hill Areas jong ka jylla Manipur kam shym la ïoh satia ïa kino kino ki jingïawer ban ïasyllok hashwa ba ka ïing kashari kan pynmih ïa katei ka rai. U la ong shuh shuh ba ka HAC kam shym la don bynta ruh ban ai jingmut na ka bynta ban pynrung ïa ka jaitbynriew Meitei ha ka thup ST. U la pyntip ruh ba ka jaitbynriew Meitei ka dei ka jaitbynriew kaba la dep ban ïoh lypa ïa ki jingïada hapoh ka Konstitushon jong ka ri India bad la pynkynthup ïa ka hapoh ka thup general, Other Backward Classes (OBC) bad Scheduled Caste (SC).
