Aizawl, Ïaïong:
Ki bor sorkar jong ka jylla Mizoram ha ka Sngi U Blei ki la pyntip ba haduh 162 tylli ki ïing briew ki la shah pynjulor na ka daw jong ka jingshah lynshop ha u lapbah lapsan bad u phria u ba jur u ba la ther tyngeh ha ka thaiñ Mamit district jong ka jylla Mizoram – ka thaiñ kaba don markhap bad ka ri Bangladesh bad ka jylla Tripura.
Hynrei la ïathuh pat ba na katei ka jingjia, kim shym la don satia kino kino ki nongshong shnong kiba la mynsaw ne duh ei ïa la ki jong ki mynsiem.
Kat kum ka jingïatuh jong u sub-divisional officer (SDO) ka West Phaileng – Vanlalchhuanawma Chawngthu u la pyntip ba ki don lai tylli ki shnong jong ka thaiñ West Phaileng sub-division kiba la shah ktah jur eh na katei ka jingjia shah lynshop ha ka bor mariang.
U SDO u la pyntip shuh shuh ba ki don haduh kumban 98 tylli ki ïing briew kiba la shah pynjulor ha ka shnong Lallen, 27 tylli ha ka shnong Chhippui bad 37 tylli ha ka shnong Kawnmawi. U la ïathuh shuh shuh ba na katei ka jingjia shah lynshop ha ka bor mariang, ki la don 61 tylli ki ïing briew kiba la julor plaiñ kat haduh ba ym shym la long shuh ban shong ban sah (40 tylli ki ïing ha Lallen, 13 tylli ha Chhippui bad 8 tylli ha Kawnmawi).
Na ka liang u DC ka Mamit – VL Remliana u la pyntip ba ki bor pynïaid distrik lem bad u MLA ka thaiñ – Lalrintluanga Sailo ki la lah ban shim ïa ki lad ki kynti ban pynbiang ïa ki lad jingïarap na ka bynta ki longïing kiba la shah ktah jur na katei ka jingjia.
Kitei ki 3 tylli ki shnong kiba la shah lynshop ha ka bor mariang ki dei ki shnong kiba hap hapoh u pud u sam jong ka Dampa assembly constituency.
Ka ïathuh ba na ka liang u MLA ka thaiñ (Sailo) ha ka Sngi U Blei u la leit ban jurip ïa kitei ki shnong bad sam ruh ïa ki lad jingïarap na ka bynta ki nongshong shnong ka thaiñ.
Shuh shuh na ka liang u President ka Mizoram BJP – Vanlalhmuaka u la sam ruh da ki song pisa sha ki longïing jong kitei ki 3 tylli ki ki shnong.
