Aizawl, Ïaïong:
Ki bor pulit jong ka jylla Mizoram ki la pyntip ba ha ka sngi Thohdieng ba la dep, 5 ngut ngut ki briew ki la duh ei ïa la ki jong ki mynsiem bad 6 ngut kiwei pat ki la mynsaw kiba jur na ka jingjia ïatakhuh kali ha kawei ka shnong kaba don ha ka thaiñ Mamit District, Mizoram.
Kat kum ka jingpyntip jong ki bor pulit, ki la ïathuh ba katei ka jingjia ka la jia hadien ba kawei ka trok ‘pickup’ kaba dang mih na ka thaiñ Rajiv Nagar ban leit sha Marpara ka la ïatakhuh bad kawei ka trok ha ka thaiñ West Phaileng, Mamit district.
Ki bor pulit ki la ïathuh ba na katei ka jingjia, ki la don 3 ngut ki briew kiba la khlad hashen katba 2 ngut kiwei pat ki la khlad hadien ba la leit ban rah sumar ïa ki sha kawei ka hospital sorkar.
Ïa ki 6 ngut kiba la ïoh ïa ki jingmynsaw kiba jur la ïathuh ba la leit ban rah sumar noh sha Civil Hospital jong ka nongbah Aizawl.
Ki 5 ngut ki briew kiba la duh ei ïa la ki jong ki mynsiem na katei ka jingjia ki kynthup ïa u Dev Kumar Chakma, Bonomota, Ayushi Chakma, Siki Chakma bad u Kajola.
Ha katei ka jingjia, la ïathuh ba dei ki dkhot jong ka Young Mizo Association kiba la pi nyngkong sha katei ka jaka ban pynbiang ïa ki lad jingïarap na ka bynta ki lanot. Kat kum ki jingïoh lum khubor la ïathuh ba katei ka jingjia ïatakhuh kali ka la jia ha kawei ka khongwaiñ kaba khim bha ka lynti.
