Imphal, Ïaïong:
Ki bor pulit jong ka jylla Manipur ha ka 23 tarik mynta u bnai ki la pyntip ba ki la ïoh ban kem ïa 2 ngut ki dkhot jong ka seng kieng atiar People’s Liberation Army (PLA) – ka shnat treikam jong ka seng Revolutionary People’s Front (RPF) na ka nongbah Imphal. La kem ïa kitei ki 2 ngut na ka daw jong ka jingdonkti jong ki ha ki kam dawa pisa beaiñ.
Na kitei ki 2 ngut, ki bor pulit jong ka jylla ki la ïoh ruh ban kurup ïa katto katne tylli ki tiar siat, 2 tylli ki ‘mobile’, kawei ka thuk thuk Activa bad katto katne ki kot ki sla ba donkam jong ka seng.
Kat kum ka jingpyllait kyrwoh jong ka tnat pulit, la ïathuh ba hadien ka jingïoh jingtip, na ka liang ki pulit ‘commando’ ka Imphal East district police unit ki la leit ban pynlong ïa ki jingkhynra bad ïoh ban kem shwa ïa u Johnson Ashem (40 snem ka rta) na ka shnong Thiyam Leikai – ka shnong ba hap hapoh ka jingkhmih jong ki bor pulit ka Lamphel police station.
Ïa utei u runar, ki bor pulit ki la ïoh ban kem katba u dang don bynta ha ki kam dawa pisa ha Palace Compound (marjan bad ka Manipur Film Development Complex), Imphal ha ka miet jong ka Sngi Thohdieng ba la dep.
Na ka jingtohkit ïa utei u ehrang, ki bor pulit ki la leit ban pynlong sa ïa kawei ka jingkhynra ha kawei ka jaka rieh jong ki dkhot ka seng bad ïoh ban kem sa ïa kawei ka dkhot jong ka PLA kaba la tip kyrteng kum ka Chingakham Kshetrimayum (30 snem ka rta) – ka nongshong shnong ka thaiñ Singjamei Mayengbam Leikai, Imphal West District.
Kat kum ka jingïathuh jong ki bor pulit ki la pyntip ba kitei ki 2 ngut ki la don bynta ha ki kam dawa pisa beaiñ hapoh ka jingïalam bad jingbthah jong uwei u nongïalam ka PLA/RPF u ba la tip kyrteng kum u Brigadier Chinglen. Ki bor pulit ki la ïathuh ruh ba kitei ki 2 ngut ki ju don bynta ha ki kam ban dawa pisa beaiñ na ki ‘riew paidbah, ki nongtrei kam sorkar, ki karikor bad kiwei kiwei.
