Agartala, Ïaïong:
Ki bor sorkar jong ka jylla Tripura ha ka Lah Sngi U Blei mynta ka taïew ka la plie paidbah ïa ka Crime Branch Police Station (CBPS) kaba nyngkong eh ha ka jylla – ka ban tohkit halor ki mokotduma kiba ïadei bad ki kam beaiñ kiba kham jwat, ki kam beaiñ ba ïadei bad ki kam khaïi droks bad kiwei kiwei ki kam beaiñ.
Ïa ka CBPS la wan ban plie paidbah da u Director General of Police (DGP) jong ka jylla Tripura – Amitabh Ranjan ha nongbah Agartala. Katei ka CBPS kan don ïa ki tnat treikam ki ban kynthup ïa baroh ki bynta jong ka jylla Tripura.
Kat kum ka jingïathuh jong ki bor sorkar, ki la pyntip ba hadien ka jingïoh ïa ki jingbit na ki bor kiba kham halor, katei ka CBPS kan shimti ïa ki kam tohkit kiba ïadei bad ki kam beaiñ ha ka pisa pilaiñ, ki kam beaiñ bad kham jwat bad kumjuh ruh ki mokotduma kiba hapoh ka Narcotics Drugs and Psychotropic Substances (NDPS) Act.
Kat kum ki jingïoh lum jingtip la ïathuh ba tad haduh kane ka kynti kaba mynta, ka jylla Tripura ka don baroh ïa haduh 83 tylli ki police station, kynthup ïa 8 tylli ba la pynïaid tang da ki pulit kynthei.
