Guwahati, Ïaïong:
Ki bor pulit jong ka jylla Assam ha ka Lah Sngi U Blei mynta ka taiew ki la pyntip ba ki la ïoh ban kem ïa 2 ngut ki dkhot jong ka Popular Front of India (PFI) na Dhubri district. Ki 2 ngut ki dkhot ka PFI kiba la shah kem ha katei ka sngi ki kynthup ïa u Shafiqul Islam bad u Saiful Islam – kiba la phet rieh naduh u Nailur, 2022.
Na ka liang ki bor pulit ki la pyntip ba ki la ïoh ban kem ïa kitei ki 2 ngut hadien ba ki la wanphai sha la ki jong ki ïing ki sem hadien bun bnai ba ki la phet rieh na ka kti jong ki pulit. Ki la ïathuh ba dei hadien ka jingïoh jingtip halor ka jingwanphai ka jong ki ba ki la leit ban pynlong ïa ka jingkhynra ha ka step jong ka Lah Sngi U Blei bad ïoh ban kem noh ïa baroh 2 ngut.
Kat kum ka jingïathuh jong ki bor pulit ki la pyntip ba u Shafiqul bad u Saiful ki la don bynta ha ki kam ban ïalam bakla ïa ki khynnah rit ban ïaleh pyrshah ïa ka sorkar India katba ki dang trei kum ki nonghikai ha kawei ka madrasa kaba don ha ka thaiñ Dhubri.
