Kokrajhar, Ïaïong:
Ki bor pahara ha ryngkat ka jingïatreilang bad ki bor pulit jong ka jylla Assam ha ka Lah Sngi U Blei mynta ka taiew ki la ïoh ban siat ïap ïa 2 ngut ki dkhot jong ka seng kieng atiar Kamtapur Liberation Organisation (KLO) ha ka jingleit khynra ïa ka ktem trei kam jong ka seng kaba don ha ka thaiñ Kokrajhar District, Assam. Ïa ka jingleit khynra la leit ban pynlong ha ka miet jong ka Lah Sngi U Blei mynta ka taiew. Ha katei ka jingleit khynra, ki la ïoh ruh ban kem ïa uwei u dkhot jong ka seng.
Ki 2 ngut ki dkhot ka KLO kiba la kyllon ïap ha ka jingïather kuli bad ki bor pahara ki kynthup ïa u Abhijit Deka na ka shnong Rowta bad u Nipon Roy na ka shnong Bongaigaon.
Kat kum ka jingpyllait kyrwoh jong ka tnat pulit, ki la pyntip ba dei hadien ka jingïoh jingtip shaphang ka jingdon jong ki dkhot ka KLO ba ki la leit ban pynlong ïa ka jingkhynra kaba jur ha ka lawbah kaba don ha Chakrashila Wildlife Sanctuary, Kokrajhar district. Ha katei ka jingleit khynra la ïathuh ba dei ki dkhot ka KLO kiba la ther kuli nyngkong bad katei ka la pynlong ïa ki bor pahara ban ther kuli markylliang tad haduh ba 2 ngut ki dkhot ka KLO ki la kyllon ïap.
Ha katei ka jingjia, la ïathuh ba la don uwei u dkhot ka KLO u ba la ïoh ïa ki jingmynsaw kiba jur bad shah kem noh ha ki bor pulit. Ki bor pulit ki la ïathuh ruh ba na katei ka jingjia ki la don ruh 4 ngut ki dkhot jong ka KLO kiba la lait phet da ka said.
Ha katei ka miet, ki bor pulit ki la ïoh ruh ban pynpra noh ïa ka ktem trei kam jong ka seng kaba don hapoh u pud u sam jong ka Chakrashila Wildlife Sanctuary. Na katei ka ktem, ki bor pahara ki la ïoh ban kurup ïa 2 tylli ki pistol, 2 tylli ki tari, 2 tylli ki wait, 4 tylli ki ‘mobile phone’, katto katne ki waiar lait bad katto katne ki kot ki sla ba donkam jong ka seng.
