Agartala, Ïaïong:
U Myntri Rangbah jong ka jylla Tripura, u Manik Saha ha ki khyndiat sngi kiba la dep u la leit sha ka nongbah Delhi ban ïakynduh ïa u Myntri ka tnat Civil Aviation jong ka Sorkar Pdeng – Jyotiraditya M Scindia bad dawa ruh na u ba ïa ka kad liengsuiñ MBB kaba don ha ka nongbah Agartala dei ban pynkylla bad pynbna noh kum ka ‘international airport’.
Ha katei ka jingleit ïakynduh ïa u Scindia, na ka liang u Myntri Rangbah u la dawa ruh ba dei ban wanrah ïa ki liengsuiñ ki ban her beit beit (direct flight) na ka nongbah Agartala sha ka nongbah Mumbai bad Hyderabad bad kumjuh ruh ban pynsdang trei kam ïa ki liengsuiñ kiba ju her ha ki por mynmiet.
Kat kum ki jingïoh lum khubor la ïathuh ba tad haduh kane ka kynti kaba mynta kim shym la don satia kino kino ki liengsuiñ kiba treikam ha ka por mynmiet na ka kad liengsuiñ MBB hadien ka por 7:40 PM na ka daw jong ka jingduna jong ki bor pahara CISF.
Halor katei, la ïathuh ba na ka liang u Myntri Rangbah u la dep ban phah ruh da ka shithi sha ka Sorkar Pdeng ba kan phah shuh shuh ïa ki bor pahara CISF ha kad liengsuiñ MBB khnang ba yn lah ban pynsdang ïa ka jingpyntreikam ïa ki liengsuiñ ha ka por mynmiet.
Ha kaba ïadei ba ki liengsuiñ (lyngba ka kad liengsuiñ MBB) ki ban pynïasoh ïa ka ri India bad kiwei kiwei ki ri jong ka pyrthei, u Myntri Rangbah u la pyntip ba ïa ka kontrak la dep ban aiti ha ka kompani SpiceJet na ka bynta ban pynïasoh ïa ka nongbah Agartala bad ka nongbah Chittagong jong ka ri Bangladesh.
U la ïathuh shuh shuh ba na ka T.15 klur ka ‘viability gap funding’ (BGF), T.3 klur la deo ban aiti sha ka SpiceJet da ka sorkar jylla.
U la pyntip shuh shuh ba ha ka 5 tarik mynta u bnai, na ka liang ka kynhun sorkar na ka Ministry of Home Affairs (MHA), ka la dep ban wan jurip ïa ka kad liengsuiñ MBB Airport na ka bynta ka ‘immigration clearance’.
