Kokrajhar, Ïaïong:
U nongïalam jong ka Bodoland Territorial Region (BTR), u Pramod Boro ha ka Sngi Ba-ar mynta ka taiew u la kyrpad ïa ki dkhot jong ka seng kieng atiar Kamtapur Liberation organization (KLO) ba kin wan ban pyndemwait bad wan ïashim bynta ha ki kam kren ïasuk bad ka sorkar jylla.
Ha kaba ïadei bad ka jingshah siat ïap jong ki 2 ngut ki dkhot ka KLO bad ka jingshah kem jong 4 ngut kiwei pat na ka thaiñ Kokrajhar ha ka step jong ka Lah Sngi U Blei, na ka liang u Boro u la ong ba ka jingthaw ïa ka seng ka ba donkti ha ki kam ban dawa pisa beaiñ na ki riew paidbah kam shym la dei satia ka sienjam ka ban wanrah ïa ka bha ka miat ha ka imlang sahlang jong ka thaiñ.
U la ong shuh shuh ba ki ktang suloi kim dei satia ki iktiar kiba lah ban wanrah ïa ka bha ka miat bad ki dkhot ka seng KLO ki dei ban wan shakhmat ban pyndemwait noh ïalade na ka bynta ka bha ka miat bad ka roi ka par jong ka imlang sahlang.
Kum ban shu ïathuh hangne, ha ka step jong ka Lah Sngi U Blei mynta ka taiew, ki la don 2 ngut ki dkhot jong ka KLO kiba la kyllon ïap hadien ka jingïather kuli bad ki bor pahara jong ka jylla ha ka jingjia kaba la jia ha ka thaiñ Chakriyagaon, Chakrashila Wildlife Sanctuary Baokhungri Hills, Kokrajhar district. Ha katei ka sngi ki la don ruh 3 ngut kiwei pat ki dkhot jong ka KLO kiba la shah kem ha ki bor pulit bad uwei pat u dkhot u ba la shah bat bad shah bom shnong ha ki nongshong shnong ka thaiñ.
Ki 2 ngut ki dkhot ka KLO kiba la shah siat ïap ha katei ka sngi ki kynthup ïa u Abhijit Deka na ka shnong Routa, Udalguri, bad u Nipon Rai na ka shnong Kashidoba, Bongaigaon. Ki 4 ngut ki dkhot ka seng kiba la shah kem ha ki bor pulit ki kynthup ïa u Amal Jyoti Biswas (24 snem ka rta) na ka shnong Borkula Bagicha, Udalguri district; Rananjay Laskar (27 snem ka rta) na ka shnong Ekorabari, Udalguri district; Pranjit Rai (26 snem ka rta) na ka shnong Bijaygaon, Chirang district bad u Ganesh Biswas (23 snem ka rta) na ka shnong Fakidiagao, Udalguri district.
