Guwahati, Ïaïong:
U Myntri Rangbah jong ka jylla Assam, u Himanta Biswa Sarma ha ka 27 tarik mynta u bnai u la pyntip ba ïa ka soskular jingïasuk (peace agreement) bad ka seng kieng atiar United Liberation Front of Asom (ULFA) yn sa lah ban ïasoi noh hashwa ban kut u bnai Jymmang mynta u snem.
Haba ïakren bad ki lad pathai khubor, na ka liang u Myntri Rangbah u la pyntip ba ïa ka ‘draft agreement’ la dep ban phah sha ka kynhun nongmihkhmat jong ka seng ULFA bad na ka liang ka sorkar ka don ïa ka jingkyrmen ba ïa ka soskular yn sa lah ban soi noh ha u bnai u ban wan.
Hynrei u la pyntip pat ba lada ka ULFA kan kyntait ïa ki kyndon jong ka ‘draft agreement’, yn lah ban pynjlan shuh shuh ïa ka tarik na ka bynta ban soi ïa ka soskular.
Ha kaba ïadei bad ka jingïakren bad ka ULFA (I) hapoh ka jingïalam jong u Paresh Baruah, u Myntri Rangbah u la pyntip ba ïa ki kam kren ïasuk ym pat shym la lah satia ban pyntyllun. U la pyntip shuh shuh ba na ka liang u nongïalam jong ka ULFA (Pro talk) – Anup Chetia u la ïoh ban pdiang ïa ka ‘draft agreement’ na ka sorkar jylla, u ba la pyntip ruh ba ïa ka soskular jingïasuk ka seng kan lah ban pidang tang lada ka Sorkar Pdeng kan mynjur ïa ki mat jingdawa jong ka seng kum ha kaba ïadei bad ka hok jong ki nongshong shnong trai muluk jong ka jylla.
Kum ban shu ïathuh hangne, dang ha ka 27 tarik mynta u bnai Sokar India bad ka Sorkar Assam ki la dep ruh ban ïasoi ïa ka soskular MoS ne ka ‘Memorandum of Settlement’ bad ka kynhun kieng atiar Dimasa National Liberation Army / Dimasa Peoples’ Supreme Council (DNLA/DPSC) ha ka jingïalang kaba la pynlong ha nongbah Delhi.
Ha katei ka jingïalang la wan ban ïashim bynta lem ruh da u Myntri Korbar Ri – Amit Shah.
