Imphal, Ïaïong:
Ki bor sorkar jong ka jylla Manipur ha kane ka taïew kaba mynta ki la pyntip ba ki bor pahara jong ka jylla ki la ïoh ban kem ïa 2 ngut ki dkhot jong ka seng kieng atiar Kuki Independent Army/Kuki Independent Organization (KIA/KIO) kiba la donkti ban leit rong tuh ïa ki tiar siat na ka ktem ba shong ba sah ki dkhot jong ki seng kieng atiar kiba dang don hapdeng ka soskular sangeh ïasiat bad ka sorkar jylla.
Ïa kitei ki 2 ngut la ïoh ban kem hadien ba ki bor shipai ka Loktak Battalion na Churachandpur Sector, Assam Rifles ki la leit ban pynlong ïa ka jingkhynra kaba jur ha ka shnong Mongjang, Churachandpur district – ka shnong ba don markhap bad ka ri Myanmar. Ïa ka jingleit khynra la pynlong ha ka sngi Palei ba la dep. Na kitei ki 2 ngut, ki bor pahara ki la ïoh ruh ban kurup ïa ki katto katne ki kot ki sla ba donkam jong ka seng. Hadien katei ka jingjia, la ïathuh ba ïa kitei ki 2 ngut lem bad ïa ki kot ki sla bad ki tiar ki tar ba la ïoh kurup la leit ban aiti noh sha ki bor pulit ka Churachandpur Police Station na ka bynta ban pynlong ïa ki jingtohkit kiba dang sah. Hynrei la ïathuh pat ba na ka liang ki bor pahara kim shym la pynpaw satia ïa ki kyrteng jong kitei ki 2 ngut kiba la shah kem.
