Guwahati, Ïaïong:
Ka seng Congress na ka jylla Assam ha kane ka taïew kaba mynta ka la pyntip paidbah biang sa shisien ba ka seng kan nym ïatreilang ne ïateh lok bad ka seng All India United Democratic Front (AIUDF) na ka bynta ka ilekshon Lok Sabha ka ban sa pynlong ha ka jylla Assam ha u snem ban wan.
Kat kum ki jingïoh lum jingtip la ïathuh ba na ka liang ka seng Congress ka la sdang ban pynkhreh na ka bynta ban ïakhun ïa katei ka ilekshon bad ka la shim ruh ïa ki sienjam ban ïasyllok bad ki nongïalam jong ki 11 tylli ki seng saiñ pyrthei kiba don ha ka liang pyrshah jong ka sorkar Assam.
Halor katei, na ka liang u General Secretary ka AICC (in-charge jong ka jylla Assam) – Jitendra Singh, u la pynbna paidbah ba u President jong ka seng Congress – Mallikarjun Kharge bad kiwei kiwei ki nongïalam jong ka AICC ki la pynmih ïa ka rai ba ka seng kan nym ïalang paralok bad ka AIUDF na ka bynta ka ilekshon Lok Sabha.
Kum ban shu ïathuh hangne, na ka liang ka Congress lem bad kiwei kiwei ki seng saiñ pyrthei jong ka jylla Assam kynthup ïa ka AIUDF ha u snem 2021 ki la thaw da ka kynhun kaba la tip kyrteng kum ka ‘Mahagathbandhan’ (grand alliance) bad ki la ïakhun ruh tylli lang kawei ïa ka ilekshon sha ka Ïing Dorbar Thaw Aiñ jong ka jylla Assam ka ba la long ha u snem 2021.Hynrei hadien ka ilekshon, na ka liang ka Congress ka la pyndkut noh ïa ka jingïadei paralok bad ka AIUDF.
Ha ka ilekshon Lok Sabha kaba la pynlong ha u snem 2019, ka BJP ka la ïoh jingjop na ki 9 tylli ki thaiñ, ka seng Congress na ki 3 tylli ki thaiñ, ka seng AIUDF bad uwei u kyrtong shimet (Naba Kumar Sarania) ki la ïoh ïa ka nam jop na mar kawei ka thaiñ.
