Agartala, Ïaïong:
Ki bor sorkar jong ka jylla Tripura ha ki khyndiat sngi kiba la leit noh ki la ïathuh ba ïa ka ïew khappud kaba don ha ka thaiñ Srinagar (bynta ba shathie jong ka jylla Tripura) yn sa plie paidbah biang ha ka 9 tarik u bnai Jymmang hadien ba la khang khyrdep mynta la palat 2 snem eiei na ka daw jong ka jingsaphriang ka jingpang COVID-19.
Ïa ka rai ban plie biang ïa katei ka ïew khappud la shim ha ka jingïalang jong ka Joint Border Haat Management Committee, ba la wan ban ïashim bynta lem da ki bor sorkar kiba na ka thaiñ shathie jong ka jylla Tripura bad ki bor pynïaid distirk jong ka thaiñ Feni jong ka ri Bangladesh.
Ha katei ka jingïalang na ka liang ki komiti ki la ïarai ban ai jingbit ïa kumba 2,400 ngut ki nongthied nongpet (mar 1,200 ngut na arliang pud) ba kin wan ban thied ban pet ha katei ka ïew ka ban plie man la ka sngi; bad mar 54 ngut ki nongdie mar na baroh arlaing pud ba kin wan ban die bad khaïï ïa ki mat ki mata jong ki.
Ha katei ka jingïalang, la ïathuh ba na ka liang ki bor sorkar jong ka ri India bad jong ka ri Bangladesh ki la ïasyllok ruh halor ki mat kiba ïadei bad ki lad ki lynti ban pynbun ïa ka jingdon jongki nongdie mar bad kumjuh ki ai ruh ïa ka jingmynjur na ka bynta ban tei ïa ka jaka leit Shabar na ka bynta ki ‘riew kynthei.
Ka jingplie biang ïa ka ïew khapud ha Srinagar la ïathuh ba ym tang ba kan kyntiew ïa ka khaïi ka pateng hapdeng ka ri India bad ka ri Bangladesh, hynrei kan wanrah ruh ïa ka jingïadei kaba marjan hapdeng ki nongshong shnong jong kitei ki 2 tylli ki ri.
