Itanagar, Ïaïong:
Ki nongïalam jong ka Chakma Development Foundation of India (CDFI) ha ki khyndiat sngi kiba la leit noh ki la kyrpad na u Myntri Rangbah jong ka jylla – Pema Khandu ba un sngewlem na ka bynta ki paid Chakma bad Hajong bad ba un nym shim ïa ki sienjam ban pynmih ïa ki na ka jylla Arunachal Pradesh ban leit pynsah ïa ki sha kiwei pat ki jylla jong ka ri India.
Na ka liang ki nongïalam jong ka CDFI ki la pyntip ba ha ka jingïalang kaba la pynlong ban rakhe ïa ka National Panchayati Raj Day ha Itanagar na ka liang u Myntri Rangbah ka jylla u la pynbna ba hadien ba la dep ban pynbeit ïa ki kam ïakajia khappud bad ka jylla Assam un sa shim sa da ki sienjam kiba kyrpang ban pynbeit ïa ki jingeh kiba ka jylla ka ïakynduh ha kaba ïadei bad ki paid Chakma bad Hajong. Ki nongïalam ka CDFI ki la ong ruh ba ha katei ka jingïalang, na ka liang u Myntri Rangbah u la pynbna ruh ba ki paid Chakma bad Hajong ki dei ki paid petwir (refugee) ki bym don ïa ka hok ban ïoh ïa ki syrnot nongshong shnong ba pura jong ka jylla Arunachal Pradesh kaba dei ka jylla kaba la ïoh ïa ka jingithuh ba kyrpang na ka Konstitushon jong ka ri India kum ka ‘tribal state.’
Halor kitei kiei kiei baroh, na ka liang u nongïalam jong ka CDFI – Suhas Chakma u la pyntip ba ïa ki paid Chakma bad Hajong la pynbiang ïa ki jaka shong jaka sah da ka Sorkar India ha North Eastern Frontier Agency (NEFA), bad naduh u snem 1964 ïa ki paid Chakma bad Hajong kiba la kha ha NEFA/Arunachal Pradesh la ithuh ba ki dei ki nongshong shnong ba pura jong ka ri India.
U la ïathuh shuh shuh ba kim shym la don kino kino ki aiñ ne ki kyndon ha ka Konstitushon ki ban ai bor ïa ki jylla ne ki union territory ban kheiñ ïa ki paid Chakma bad Hajong kum ki nongshong shnong bar ri.
U nongïalam ka CDFI u la pyntip shuh shuh ba bun na kito ki paid Chakma bad Hajong kiba la wan ban shong ban sah ha Arunachal Pradesh ha ki snem 1964-1969 ki la khlad, bad ïa kito kiba dang im yn ym lah ban pynmih na ka jylla Arunachal Pradesh kat kum ki jingbthah jong ka Supreme Court ha u snem 1996 kaba ïadei bad ka mokotduma NHRC pyrshah ïa ka sorkar Arunachal Pradesh.
U nongïalam ka CDFI u la pyntip shuh shuh ba kim shym la don kino kino ki khyrnit jong ka Konstitushon ki ban ai ïa ka jingithuh ïa ka jylla Arunachal Pradesh ne ïa kino kino ki jylla kum ka ‘tribal state,’ bad dei tang ka Article 371(h) jong ka Konstitushon kaba pynkupbor kaba kyrpang ïa u Lat jong ka jylla Arunachal Pradesh. U la pyntip ba dei namar kitei ki daw ba ka jingkheiñ ïa ki paid Chakma bad Hajong kum ki paid phetwir, ne ban kheiñ ïa ka jylla Arunachal Padesh kum ka ‘tribal state’ ki dei kiba bakla.
Katkum ki jingïoh lum jingtip la ïathuh ba ki don haduh kumba 65,000 ngut ki paid Chakma bad Hajong kiba shong ba sah ha ka jylla Arunachal Pradesh hadien ba ki pateng barim jong ki ki la mih noh na East Pakistan (mynta ka ri Bangladesh) bad ïoh ïa ka jaka sah na ka Sorkar Pdeng ha North East Frontier Agency (NEFA – mynta ka jylla Arunachal Pradesh) ha u snem 1964 – hadien ka jingkut jong ka thma hapdeng ka ri India bad ka ri China.
