Guwahati, Ïaïong:
Hadien ba ka sorkar Assam ka la khang pyrshah ïa ka jingwan pynpoi ïa ki syiar ‘broiler’ ha Assam na kiwei pat ki jylla jong ka ri India, la ïathuh ba kynsan kynsan ka dur ka mur jong ki syiar ka la kiew da bun bun shah.
Kat kum ki jingïoh lum jingtip la ïathuh ba ka sorkar jylla ka la khang pyrshah ïa ka jingwan pynpoi ïa ki syiar na kiwei kiwei ki jylla hadien ka jingsaphriang jong ka jingpang ‘avian influenza’ ka ba lah ban ktah ïa ka koit ka khiah jong ki sim ki doh bad kumjuh ïa ki nongshong shnong ka jylla. Hynrei katei ka jingkhang pyrshah ïa ka jingwan pynpoi syiar ka la wanrah ïa ka jingkiewdor kaba jur ha kaba ïadei bad ka dor ka mur jong ki syiar.
Halor katei ka mat, na ka liang u Myntri ka tnat Agriculture jong ka jylla Assam – Atul Bora ha ka jaka ba un kren eiei halor ki mat ki ban lah ban weng ïa ki jingeh pynban u la pyntip ba na ka liang ka sorkar kam shym la lah ban leh eiei ne shim ïa kino kino ki sienjam ban tehlakam ïa ka jingkiew dor jong ki syiar ha ka jylla.
Haba ïakren bad ki lad pathai khubor, na ka liang u Myntri u la ïathuh ba ka dor jong ki syiar kiba ki nongshong shnong ka jylla ki ju ri ki kham heh ka dor namar ka sorkar jylla kam don ïa kano kano ka bor ban pynbeit ïa ka dor ka mur. U la ong ruh ba ka daw kaba hakhmat eh kaba la pynlong ïa ki syiar ba pynmih na ka jylla ba kin kham heh ka dor ban ïa kito ki syiar kiba la wan ban pynpoi na shabar jylla ka dei namar ka jingrem ki jingbam syiar ban pynheh pynsan ïa ki.
U Myntri u la pyntip ruh ba na ka liang ka jong u, u la leit ban ïakren bad u Myntri Rangbah ka jylla – Himanta Biswa Sarma u ba la shim ruh ïa ki sienjam kiba donkam ban pynbiang ïa ki ‘subsidy’ ha ki jingbam syiar na ka bynta ki nongri syiar kiba na ka jylla Assam. Hynrei na ka liang u Myntri u la ïathuh pat ba um shym la don ïa kano kano ka jingtip kaba shai ba kumno katei ka skhim ka trei kam.
Na ka liang u Myntri u la pyntip shuh shuh ba jylla Assam ka dei ka jylla kaba dap ba biang ha kaba ïadei bad ka jingpynmih ïa ki syiar hynrei ka duna pat ha ka liang ka jingpynmih ïa ki sniang/doh sniang.
Kat kum ki jingïoh lum jingtip la ïathuh ba ha ki khyndiat sngi kiba la leit noh, ka dor jong ki syiar ha ka jylla Assam ka la kiew kynsan da kumba 10% haduh 50% eiei.
