Guwahati, Jymmang:
Ki bor sorkar jong ka jylla Assam ha ka sngi U Blei ba la dep ki la pyntip ba ha ka jingleit khynra pyrshah ïa ki kam beaiñ kiba ïadei bad ki kam pynïap beaiñ ïa ki mrad khlaw ki la ïoh ban kem ïa 3 ngut ki runar ha ryngkat ki snieh bad shyieng khla na ka thaiñ Barpeta district, Assam.
Ïa ka jingleit khynra ha katei ka sngi la pynlong da ki bor sorkar ka Manas Tiger Project ha ka shnong Labdanguri (marjan bad ka Manas National Park), hadien ka jingïoh ïa ki jingtip kiba bniah. Ha katei ka jingleit khynra jong ki, ki la ïoh ban kurup ïa palat 8 kilo ka snieh bad shyieng khla na ki ïing sah jong kitei ki 2 ngut ki runar.
Kat kum ka jingïathuh jong ki bor sorkar, ki la pyntip ba ki snieh bad shyieng khla ba la ïoh ban kurup ha katei ka sngi ki shongdor haduh kumba 20 lak eiei.
Ki 3 ngut ki runar kiba la shah kem ha katei ka sngi ki kynthup ïa u Balendra Gayari, Munindra Basaumatary, bad u Dimbe Gayari. Kitei ki 3 ngut ki la shah pynngat ruh hapoh ki kyndon bapher bapher jong ka Wildlife Protection Act.
