Guwahati, Jymmang:
Ha ka sngi Saitjaiñ kaba la dep la ïathuh ba ki la don katto katne ngut ki nongtrei jong kawei ka lad pathai khubor na ka thaiñ Silchar, Cachar district, Assam kiba la shah thombor ha kawei ka kynhun runar katba ki dang don ha lynti ban leit phai sha la ïing hadien ba la kut ki kynta trei kam.
Kat kum ki jingïoh lum jingtip la ïathuh ba katei ka jingjia ka la jia ha ka miet jong ka Sngi Saitjaiñ kaba la dep. Ha katei ka jingjia, la ïathuh ba ki runar ki la donkti ban tuh ruh ïa ka mobile bad kiwei kiwei ki jingdon jingem jong uwei na ki nongtrei lad pathai khubor.
Hadien ka jingïoh ïa ka jingujor, na ka liang ki bor pulit ki la pynrung da ka FIR bad ïoh ruh ban kem ïa ki 4 ngut ki runar kiba donkti ha katei ka kam beaiñ. Ki 4 ngut ki runar kiba la shah kem ki kynthup ïa u Pritam Sutradhar (21 snem ka rta), Rupak Sutradhar (23), Akash Roy (19), bad u Jeet Bhattacharjee (22) – kiba dei baroh ki nongshong shnong ka thaiñ Silchar. Na ka liang ki bor pulit ki la pyntip ba ki la shim ïa ki lad ki lynti ba kyrpang ban pynlong ïa ka jingtohkit pyrshah ïa kitei ki runar.
