Imphal, Jymmang:
Ki bor sorkar jong ka jylla Manipur ha ka 1 tarik mynta u bnai ki la pyntip ba 2 ngut ki dkhot jong ka seng kieng atiar Kangleipak Communist Party – People’s War Group KCP (PWG) ki la wan ban pyndemwait noh ïalade hakhmat ki bor pahara jong ka jylla. Ha katei ka sngi, kitei ki ehrang ki la wan ban aiti ruh ïa kawei ka .22 pistol, kawei ka .22 pistol magazine, 10 tylli ki kuli .22 bad 2 tylli ki bom ‘hang grenade’.
Kat kum ka jingpyllait kyrwoh jong ka tnat shipai Assam Rifles la ïathuh kitei ki 2 ngut ki dkhot ka KCP-PWG ki la wan ban pyndemwait noh ïalade hadien ba ki shipai ka Somsai Battalion hapoh ka jingkhmih jong ka shlem treikam jong u Inspector General of Assam Rifles (South) ki la lah ban shim ïa ki lad ki lynti ban ïasyllok bad pynkohnguh ïa ki ban wan pyndemwait noh ïalade.
Ha ka jingïalang pyndemwait la wan ban ïashim bynta bad don lang ruh da ki bor pulit jong ka jylla. Ïa ka jingïalang pyndemwait la pynlong ha ka sngi U Blei ba la dep ha ka shnong Somsai, Ukhrul District.
Kum ban shu ïathuh hangne, dang ha ka 21 tarik jong u bnai Ïaïong ki la don haduh 36 ngut ki dkhot jong ka seng kieng atiar Chin-Kuki Liberation Army (CKLA) bad uwei u dkhot jong ka People’s Revolutionary Party of Kangleipak (PREPAK-Pro) kiba la wan ban pyndemwait noh ïalade ha ka jingïalang pyndemwait kaba la pynlong ha Manipur Rifles Banquet Hall, Imphal ha kaba u Myntri Rangbah ka jylla – N Biren Singh u la wan ban ïashim bynta kum u kongsan.
