Guwahati, Jymmang:
Ki shipai ka Assam Rifles ha ka 2 tarik mynta u bnai ki la leit ban pynlong ïa ka jingkhynra ha ka ïing sah jong uwei u nongïalam jong ka seng NSCN (IM) bad na katei ka ïing ki la ïoh ban kurup ïa katto katne ka pisa, ki pisa thok, ka suloi air gun bad kiwei kiwei ki jingdon jingem.
Kat kum ki jingïoh lum khubor la ïathuh ba ïa ka jingleit khynra ha katei ka sngi, ka tnat shipai Assam Rifles ka la leit ban pynlong kum shi bynta ban ïoh kem ïa u nongïalam jong ka NSCN (IM) u ba la tip kyrteng kum u Athong Sangtham. La leit ban pynlong ïa ka jingkhynra ha ka ïing sah jong u kaba don ha ka shnong Bamunpukhari, Dimapur; hynrei utei u nongïalam ka NSCN (IM) u la ïoh ban phet noh hashwa ba ki bor shipai kin wan poi ha ïing jong u.
Na ka ïing sah jong u Athong, ki bor shipai ki la ïoh ban kurup ïa T.40, 000 ha ryngkat 87 tylli ki pisa thok, kaei ka radio ha ryngkat u ‘charger’, 2 tylli ki ‘smartphone’, kawei ka ‘non-multimedia Mobile Phone’, kaei ka ‘Air Gun Rifle’ ha ryngkat u ‘scope’, 2 tylli ki lama jong ka NSCN, katto katne ki kot ki sla jong ka NSCN bad kawei ka kali Maruti Alto 800.
Kat kum ka jingïathuh jong ki bor shipai ka Assam Rifles ki la pyntip ba ki la leit ban pynlong ïa katei ka jingleit khynra hadien ka jinglap ïa ka jingdonkti jong u Athong Sangtham ha ka jingjia shah rahbor jong ki 6 ngut ki ‘riew paidbah ba ki bor shipai ki la ïoh ban pyllait im ha ka 28 tarik jong u bnai ba a dep. Ha ka 28 tarik, la ïathuh ba ki bor shipai ki la ïoh ruh ban kem ïa ki 5 ngut ki dkhot ka NSCN (IM) na kawei ka ïing kaba ki la ïoh ban pyllait im ïa kitei ki 6 ngut.
