Dibrugarh, Jymmang:
Ki bor sorkar jong ka jylla Assam ha ka 2 tarik mynta u bnai ki la pyntip ba uwei u rangbah na ka thaiñ Dibrugarh District u la duh ei ïa la ka jong ka jingim hadien ka jingjia shah lynshop bor mariang kaba la jia ha ka miet jong ka Sngi Ba-ar ha ka shnong Moran.
Kat kum ka jingïathuh jong ki bor sorkar, ki la pyntip ba u rangbah u ba la duh ei ïa la ka jong ka jingim na katei ka jingjia u dei u ba la tip kyrteng kum u Sukeswar Gogoi – u ba la khlad noh na ka jingshah ban ha uwei u dieng bah u ba la kyllon hadien ka ‘erlangthari kaba la khyrwit tyngeh ïa ka thaiñ. Ki bor sorkar ki la pyntip ruh ba na katei ka jingjia, ki la don bun tylli ki dieng bad ki paia bording ilektrik kiba shah jyndat bad kaba la wanrah ruh ïa ka jingsangeh treikam jong ka bording ilektrik ha kylleng ki bynta jong ka thaiñ.
Kat kum ka jingïathuh jong ki bor sorkar ka ASDMA, ki la pyntip ba ka thaiñ Moran, Tingkong, bad Dibrugarh east ki dei ki thaiñ kiba la shah ktah jur eh na katei ka jingjia shah lynshop ha ka ‘erlangthari bad na ka liang ka tnat ka la pynsdang ïa ki jinglum jingtip kiba bniah halor katei ka jingjia.
