Aizawl, Jymmang:
U Myntri Rangbah jong ka jylla Mizoram, u Zoramthanga ha ka Sngi Palei mynta ka taiew u la phah da ka shithi sha u Myntri Rangbah jong ka jylla Manipur – N Biren Singh ban kyrpad na u ba un shim ïa ki lad ki lynti kiba kyrpang khnang ba yn lah ban tehlakam bad pynsangeh ïa ki jingkulmar kiba la jia ha kylleng ki bynta jong ka jylla bad kumjuh ruh ban pynneh pynsah ïa ka shongsuk shongsaiñ ha ka jylla Manipur.
Na ka liang u Myntri Rangbah ka Mizoram u la pynpaw ruh ba u dap da ka jingsngewsih kaba khraw halor ki jingkulmar bad jingïaumsnam kiba la jia ha kylleng ki bynta jong ka jylla Manipur bad kumjuh ruh halor ki jingthuh ka shongsuk shong saiñ hapdeng ki jaitbynriew Meitei bad ki nongshong shnong trai muluk jong ka jylla Manipur.
Ha ka jingpyllait kyrwoh jong u Myntri Rangbah u la ong ba kum u Myntri Rangbah ka Mizoram kaba dei ka jylla kaba don ïa ka jingïadei kaba jan bad ka jylla Mannipur la ka long ha ka liang ki riti ki dustur bad kumjuh ruh ha ka liang ka histori, u dap da ka jingsngewsih kaba khraw ban ïohi ïa ki jinglong jingman jong ka jylla Manipur ha kine ki sngi ba mynta.
Na ka liang u Zoramthanga u la kyntu ïa u N Biren Singh ba un lum un lang ïa ki tnat treikam bapher bapher jong ka jylla na ka bynta ban pynkut noh ïa ki jingïakynad bad jingkulmar kiba la jia ha ka jylla Manipur. Na ka liang u Zoramthang u la pyntip ruh ba ma u lem bad ka sorkar jong u lem bad ki nongshong shnong jong ka jylla Mizoram kin ïatreilang na ka bynta ban wanrah biang ïa ka suk ka saiñ ha ka jylla Manipur.
U la kynpad shuh shuh ïa u N Biren Singh bad kyntu ba un shim ïa ka lyngkor ban pyndonkam ïa ka iktiar kum u Myntri Rangbah u ba ïalam ïa ka jylla – ban wer ïa ki lad treikam ba kin ïatylli kawei khnang ban pynkut noh ïa ki jingïakynad bad jingïakulmar baroh.
Na ka liang u Zoramthanga u la kyntu ruh ba man la uwei pa uwei u nongshong shnong u dei ban shim ïa ka kamram na ka bynta ban wanrah biang ïa ka shongsuk shongsaiñ ha ka jylla bad ba kin kiatr na kino kino ki kam pynmih jingkulmar – ban ïa pynbeit noh ïa baroh ki jingïasngewpher jingmut lyngba ki lynti kiba jai jai na ka bynta ka bha ka miat jong ka jylla bad ki nongshong shong baroh khlem da peit shiliang ïano ïano ruh.
Kum ban shu ïathuh hangne, la ong ba ki paid Kuki lane ki Zo thnathlak kiba shong ba sha ha ka jylla Manipur ki don ïa ka jingïadei kaba ïajan bha bad ki paid Mizo kiba shong ba sah ha ka jylla Mizoram.
Ha ka jingpyllait kyrwoh jong u Zoramthanga, u la pyntip shuh shuh ba u la ïakren ruh ba ki heh sorkar jong ka tnat Kam Pohïing jong ka Sorkar Pdeng – kiba la ai ruh ïa ka jingmynjur ban phah shuh shuh ïa ki kynhun pahara jong ka Sorkar Pdeng sha ka jylla Manipur.
Na ka liang u Myntri Rangbah ka Mizoram u la kyntu ruh ïa u Myntri ka Tnat Kam Pohïing jong ka jylla – Lalchamliana bad ïa u home commissioner & secretary – H Lalengmawia ba kin pynlong ïa ka jingïalang kaba kyrkieh na ka bynta ban shim ïa ki lad ki lynti kiba donkam na ka bynta ka suk ka saiñ ka jong ki paid Zo hnathlak kiba shong ba sah ha ka jylla Manipur.
