Guwahati, Jymmang:
U Myntri Rangbah jong ka jylla Assam, u Himanta Biswa Sarma ha ka 4 tarik mynta u bnai u la leit ban plie mawnongrim na ka bynta ban pyntrei ïa haduh 46 tylli ki projek ba shongdor T.2,500 klur ha ka thaiñ Karbi Anglong district.
Ha ka jingïalang kaba la pynlong ha ka shnong Diphu, u Myntri Rangbah u la pyllait ïa kitei ki projek ki ban pyntrei hapoh ka tnat Public Works Department (PWD), Public Health Engineering (PHE), Health & Family Welfare bad kiwei kiwei.
Haba ai jingkren ha katei ka jingïalang, na ka liang u Myntri Rangbah u la ong ba ka jingplie mawnongrim ïa kitei ki projek ka dei shi bynta na ka jingkular sha ka thaiñ Karbi Anglong District ba ka sorkar ka la pynbna paidbah hashwa ban pynlong ïa ka ilekshon ha u snem ba la dep. U la ong shuh shuh ba ki projek surok ki ban pyntrei shen kin long ka jingkyrkhu na ka bynta ki nongshong shnong baroh jong ka thaiñ Karbi Anglong.
U Myntri Rangbah u la pyntip ba katto katne na kite ki projek ki kynthup ruh ïa ka jingpynbha ïa ka surok kaa pynïasoh ïa ka shnong Hamren bad ka shnong Howraghat (T.922 klur na ka bynta 75 km) bad kumjuh ruh na ka bynta ban tei ïa ka shlem treikam kaba thymmai jong u Deputy Commissioner ha ka jingpynlut pisa kaba T.26 klur.
Kiwei kiwei ki projek ki kynthup ïa ka jingpynshna ïa 130 tylli ki Model Anganwadi Centre (T.300 klur) bad kumjuh ruh ka jingpyntrei ïa ka skhim Jal Jeevan Mission ha ka jingpynlut pisa kaba haduh T.895 klur.
Hadien ka jingplie mawnongrim, na ka liang u Myntri Rangbah u la leit ruh ban ïashim bynta ha ka General Meeting kaba 50 jong ka Central Executive Committee jong ka Karbi Students’ Association (KSA) kaba la pynlong ha ka shnong Dillai – marjan bad ka shnong Diphu. Ha katei ka jingïalang, na ka liang u Myntri Rangbah u la ïaroh ïa ka KSA kaba la don bynta ban trei na ka bynta ka bha ka miat bad ka roi ka par jong ka imlang sahlang ki paid Karbi.
