Guwahati, Jymmang:
U Joy Ram Engleng, u MLA barim jong ka seng BJP bad kumjuh ruh u Chief Executive Member (CEM) barim jong ka Karbi Anglong Autonomous Council (KAAC) ha ka 5 tarik mynta u bnai u la leit ban pynïasoh noh ïalade bad ka seng Congress ha ka jingïalang pdiang don burom kaba la pynlong ha Diphu, Karbi Anglong, Assam.
Ha katei ka jingïalang la wan ban ïashim bynta lem ruh da u President jong ka Assam Pradesh Congress Committee – Bhupen Bora bad u MP jong ka Lok Sabha – Gaurav Gogoi.
Ha ryngkat u Engleng, la ïathuh ba u dkhot barim jong ka KAAC – Bhupen Hasnu bad 7 ngut kiwei pat ki dkhot jong ka seng BJP ki la leit ban pynïasoh bad ka seng Congress.
Kat kum ki jingïoh lum jingtip la ïathuh ba dang shen na ka liang u Engleng u la ieh noh ïa ka seng BJP da kaba phah ruh da ka shithi ieh noh kam sha u nongïalam ba hakhmat jong ka Assam BJP – Bhavesh Kalita.
Kum ban shu ïathuh hangne, u Engleng u la ïoh ïa ka nam jop ha ka ilekshon Ïing Dorbar Thaw Aiñ jong ka jylla Assam ha u snem 2016 kum u kyrtong jong ka seng BJP na ka thaiñ Howraghat Assembly constituency, Karbi Anglong district. Hynrei ha ka ilekshon jong u snem 2021, ka seng BJP ka la kyntait ban ai ïa ka tiket ban ïakhun ilekshon.
Kat kum ki jingïoh lum khubor la ïathuh ruh ba hadien ba u Engleng u la leit ban pynïasoh ïalade bad ka seng Congress, na ka liang u Myntri Rangbah ka jylla – Himanta Biswa Sarma u la kynthoh ruh ba u Engleng ha ki khyndiat snem kiba la leit noh um shym la don satia ïa ka bynta kaba donkam ha ki kam saiñ hima sima ha ka thaiñ Karbi Anglong.
U Myntri Rangbah u la kynthoh ruh ba ha man ka por ba u leit ban jngoh ïa ka thaiñ Karbi Anglong, u la pyntip ba um ju ïohi durkhmat satia ïa u Engleng bad um ju ïashim bynta ruh ha ki lad treikam jong ka seng ha ka thaiñ. U la ong ba ka jingleit pynïasoh jong u Engleng sha ka seng Congress kan nym wanrah satia ïa kano kano ka jingeh na ka bynta ka seng BJP.
