New Delhi, Jymmang:
Ha ryngkat ka jingsngewkhia halor ka jingmih jong ki jingïakynad bad ki kam thombor ba shyrkhei ha ka jylla Manipur, u MP ka seng Rashtriya Janata Dal (RJD), u Manoj Jha u la phah da ka shithi sha ka President jong ka ri India – Droupadi Murmu ban kyrpad na ka ba kan pyntreikam noh da ka President’s Rule ha ka jylla Manipur, da kaba kynnoh ruh ba ka Sorkar Jylla ka la rem ha kaba ïadei bad ka jinglah ban tehlakam ïa ka shongsuk shongsaiñ.
Ïa katei ka jingdaw jong u MP ka Rajya Sabha u la pynmih hadien shi sngi ba ka sorkar jylla ka la bthah bad ai bor ruh ïa ki district magistrate ha kylleng ka jylla ba kin pynmih da ka hukum ban siat beit ïa kino kino ki briew kiba donkti ha ki kam ban pynmih ïa ki jingkulmar.
Ha ka shithi ba u MP u la phah sha ka Murmu, u la pynpaw ïa ka jingsngewkhia kaba jur halor ki jingjia kiba la jia ha ka jylla Manipur bad pyntip ruh ba ki jingïakynad ki la pur bad saphriang sted ha kaba ka la wanrah ruh ïa ka jingduh jong ki mynsiem ba lui lui bad jingjulor ba shyrkhei jong ki ïing ki sem bad jingdon jingem jong ka jylla.
Ha ka shithi, na ka liang u MP u la pyntip ruh ba kum kiei ki jingjia ïakynad jaitbynriew ki la wanrah ïa ka jingeh kaba khraw na ka bynta ka jylla Manipur. U la pyntip ba ka jingdawa jong ki paid Meitei ban ïoh ïa ka kyrdan Scheduled Tribe (ST) ka dei kawei na ki mat kaba la wanrah ïa ki jingpyrshah kiba jur na ka liang kiwei kiwei pat ki paid nongshong shnong Rilum jong ka jylla Manipur. U la pyntip ruh ba mynshwa ki jingïakajia ki la jia na ka daw jong katei ka mat; hynrei ha kane ka kynti kaba mynta, ki jingïakynad bad jingïakajia ki la ong kiba kham jur bad kaba wanrah ruh ïa ka jingsngewkhia ha ki paid ba bun ba lang.
U la kynnoh ruh ba ki jingïakajia bad jingïakynad ki la nang sniew dur shuh shuh na ka daw jong ka jingdonkti ka sorkar jylla ban peit shiliang khmat bad kumjuh ruh na ka daw jong ka jingbym ban tehlakam ïa ki jingmih jong ki jingïakajia.
Na ka liang u MP u la pyntip ruh ba bun na ki nongshong shnong kiba la ïakynduh jingeh na kitei ki jingjia ki dei ki ‘riew paidbah kiba lui lui ki bym don jaka phet ne jaka rieh sha kiwei kiwei ki jaka. Na ka liang u MP u la pyntip ba ka jingpyntreikam ïa ka President’s Rule kan dei tang kawei ka lad ka ban pynjai jai ïa ki jinglong jingman ha ka jylla Manipur ha kum kine ki sngi kiba mynta. U la ong ruh ba ka jingpyntreikam ïa ka President’s Rule ka long kaba donkam na ka bynta ban ïada ïa ki nongshong shnong bad ïa ki jingdon jingem jong ka jylla.
