Guwahati, Jymmang:
Ki bor pulit jong ka jylla Assam ha ka 6 tarik mynta u bnai ki la pyntip ba kawei ka samla kaba dang 20 snem ka rta ka la shah rahbor bad shah leh be-i-jot ha runar ha ka thaiñ Gohpur, Assam. Ki bor pulit ki la pyntip ba katei ka jingjia ka la jia ha ka 5 tarik mynta u bnai, shi sngi hadien ka jingjia shah leh be-i-jot bad shah pynïap jong kawei ka khynnah rit kaba la jia ha ka thaiñ Margherita.
Kat kum ki jingïoh lum khubor la ïathuh ba katei ka samla ka la shah patan jubor na la ïing ha uwei u runar u ba la tip kyrteng kum u Poransadgoura Basumatary, u ba la leit ban pynrung jubor ha kawei ka kali kaba la ap lypa da ki 2 ngut ki paralok jong u kiba la tip kyrteng kum u Sohen Goyari bad u Vijay Mosahari. La ïoh jingtip ruh ba kitei ki runar ki la don bynta ruh ban ring dur da ki mobile ïa ki kam pohjait jong ki.
Hadien katei ka jingjia la ïathuh ba na ka liang katei ka samla ka la leit ban ujor sha ki bor pulit, bad na ka liang ki bor pulit ki la shim da ki sienjam kiba kyrpang ban pynlong ïa ki jingtohkit bad ïoh ruh ban kem noh ïa baroh 3 ngut kitei ki runar.
Kat kum ki jingïoh lum khubor la ïathuh ba na ka liang ka tnat pulit ka la pynrung da ka mokotduma pyrshah ïa kitei ki runar bad pynngat ruh hapoh bun tylli ki kyndon aiñ na ka bynta ban pynlong ïa ki jingtohkit kiba dang sah.
