Kohima, Jymmang:
Ki bor sorkar jong ka jylla Nagaland ha ka 7 tarik mynta u bnai ki la pyntip ba ki la don haduh 676 ngut ki nongshong shnong jong ka jylla kiba ïoh lad ban wanphai na Manipur, hadien ka jingmih jong ki jingïakajia bad jingïaumsnam kiba jur kiba la jia ha ka jylla Manipur naduh ka 3 tarik mynta u bnai.
Ki bor sorkar ki la pyntip ba baroh kitei ki nong Nagaland ki la ïoh ban wanphai biang sha la ka jong ka jylla ha ka 7 tarik mynta u bnai (Sngi U Blei).
Ki la pyntip ruh ba kitei ki nongshong shnong ka jylla ki la lah ban wan poi suk poi saiñ ha ka nongbah Kohima lyngba ka jingïoh ïa ki lad jingïarap bad jingïatreilang hapdeng ki bor pulit jong ka jylla bad ki bor shipai ka Assam Rifles.
Halor katei ka jinglah ban wanphai biang jong ki nongshong shnong sha ka jylla, na ka liang u Myntri Rangbah Neiphiu Rio u la pynpaw ïa ka jingkmen kaba khraw ba ki nongshong shnong ka jylla ki la lah ban wanphai ha ryngkat ka suk ka saiñ bad khlem kino kino ki jingthut ne ki jingeh kiba ki ïakynduh shiteng lynti.
Na ka liang u Myntri Rangbah u la ai ruh ïa ka jingïaroh kaba khraw ïa baroh ki tnat/lad trei kam kiba la don bynta ban leit shaw ïa ki nongshong shnong ka jylla, khamtam ïa ka tnat shipai Assam Rifles kaba la lah ban ïatrei lang ryngkat bad ka Sorkar Jylla.
Kat kum ka jingpyllait kyrwoh jong ka tnat shipai ka la pyntip ba lyngba ka sien jam hapoh ka jingïalam jong u Brigadier na ka shlem treikam jong ka tnat shipai kaba don ha ka nongbah Kohima, hapoh ka jingkhmih jong ka shlem treikam Inspector General Action Request (IGAR) Headquarters ki bor shipai ha ki 2 sngi ki la lah ban wan pynphai suk pynphai saiñ ïa jan baroh ki nongshong shnong ka jylla Nagaland.
Haba phai sha kawei pat ka khubor, la ïathuh ba na na ka liang ki bor pahara ki la lah ban pyllait bad pynbiang jaka shong jaka sah ïa haduh kumba 23,000 ngut ki riew paidbah kiba la ïakynduh ïa ki jingeh na ki jingkulmar kiba la jia ha ka jylla Manipur.
Tad haduh ka 7 tarik mynta u bnai, la ïoh jingtip ba ki la don haduh 54 ngut ki briew kiba la duh ei ïa la ki jong ki jingim na ki jingïakajia kiba la jia ha ka jylla Manipur naduh ka 3 tarik mynta u bnai.
