Itanagar, Jymmang:
Ki bor pulit jong ka jylla Arunachal Pradesh ki la pyntip ba ha ka 7 tarik mynta u bnai ki la ïoh ban tam noh ïa ka metïap jong uwei u pulit langrut uba la jah rngai na ki kynta trei kam jong u. Ki la pyntip ba ïa ka metïap jong utei u pulit ba la tip kyrteng kum u Roshan Gongo na 1st IRBn la ïoh ban tam na jrong tnum jong kawei ka shlem treikam kaba pynïasoh ïa ka block-1 bad block-2 jong ka State Civil Secretariat.
Kat kum ki jingtohkit, na ka liang ki bor pulit ki la pyntip ba utei u pulit langrut u la khlad hadien ba u la ur na ki mawkyndon jong ka mala kaba lai. Ki la pyntip ruh ba utei u pulit u la mad ïa katei ka lanot na ka daw jong ka jingbakla lade.
Halor katei ka jingjia, la ïathuh ba ïa ka mokotduma (unnatural death) la leit ban pynrung noh ha Itanagar police station.
Na ka liang ka tnat pulit ka la pyntip ba hadien ka jingjah rngai jong u Roshan ha ryngkat ka tiar pahara na ka jaka ap pahara (sentry post no. 3 jong ka shlem treikam block 2), ki la leit ban pynlong ïa ka jingleit wad kaba jur bad tang hadien khyndiat kynta ki la shem ïa ka metïap jong utei u pulit nalor kawei ka tnum sleb dewbilar. Hadien katei ka jingjia la ïathuh ba ïa ka metïap jong utei u pulit langrut la leit ban pynkynriah noh sha RK Mission Hospital na ka bynta ban pyndep ïa ka ‘post mortem’.
